Көктем келді, құстар келіп салды ән,
Дүние оянд(ы), қыстай бей-жай қалғыған.
Қызыл, жасыл гүлге толы кең далам,
«Кел, балам» деп, шақыруда алдыдан.
Келді наурыз, келді баба дәстүрі,
Қариялардың түсті еске жас күні.
Қайта естілді, жеңгейлердің жымия,
«Еркетай» деп еркелеткен назды үні.
Наурыз көже, дәміңе тамсанамыз,
Аңсап, күткен сағынып, қарт анамыз.
Айлы түнде ойналды-ау, ақсүйегім
Қайта оянып, ұлттық сал-санамыз.
Шабандоздар, «көкпарым» деп тартысқан,
Жанкүйерлер, айқайлауда әр тұстан.
Құралай көз мерген атып жамбыны,
Сом білектер боз кілемде қарпысқан.
Ақ боз үйлер, кең далаға тігілген,
Жастар әні басталатын іңірден.
Жылды осылай қарсы алатын қазағым,
Саумал сауып, сары қымыз сімірген.
Көктем келді, құстар келіп салды ән,
Дүние оянд(ы), қыстай бей-жай қалғыған…
Бауыржан ЕЛЕУСІНОВ.
