Бүгін Қызылорда қаласында «Таза Қазақстан» республикалық акциясы аясында Қызылорда облысы Полиция департаментінің қызметкерлері профилактикалық іс-шара өткізді.
Мемлекет басшысының бастамасына сәйкес жүзеге асырылып жатқан акция шеңберінде облыс аумағында экологиялық құқық бұзушылықтардың алдын алу және қоршаған ортаның тазалығын сақтау бағытында жүйелі жұмыстар жүргізілуде.
Акцияның басты мақсаты – рұқсатсыз қоқыс орындарының пайда болуына жол бермеу, экологиялық заңнаманың сақталуын қамтамасыз ету, тазалық пен тәртіп мәдениетін қалыптастыру және азаматтардың қоршаған ортаға деген жауапкершілігін арттыру.
Жыл басынан бері акция аясында 254 полиция қызметкерінің қатысуымен 5 мыңнан астам рейдтік іс-шара ұйымдастырылып, нәтижесінде 5963 әкімшілік құқық бұзушылықтың жолы кесілді. Оның ішінде 1196 дерек қоғамдық орындарды ластауға қатысты болса, 4767 дерек абаттандыру қағидаларын бұзу фактілері бойынша тіркелген.
Сонымен қатар облыс көлемінде 20 заңсыз қоқыс орны анықталып, олар бойынша тиісті құжаттар құзырлы органдарға жолданып, қоқыс орындарын жою бағытында жұмыстар жүргізілді.
Сондай-ақ акция шеңберінде Қоғамдық қауіпсіздік басқармасының бастамасымен ағымдағы жылдың 4-6 мамыр аралығында «Таза қоғам – таза аймақ» жедел-профилактикалық іс-шарасы өткізіліп, оның қорытындысымен 771 әкімшілік құқық бұзушылықтың жолы кесілді. Оның 92-сі қоғамдық орындарды ластауға, ал 679-ы абаттандыру қағидаларын бұзуға қатысты болды.
Бүгінгі профилактикалық іс-шара барысында да қоғамдық орындардағы тазалық талаптарының сақталуына бақылау жүргізіліп, тұрғындарға түсіндіру жұмыстары ұйымдастырылды.
Қызылорда облысы Полиция департаменті тұрғындарды қоршаған ортаны таза ұстауға, қоғамдық тәртіп пен тазалық мәдениетін сақтауға шақырады.
«Таза Қазақстан» акциясы аясындағы жұмыстар алдағы уақытта да тұрақты түрде жалғасын табады.
