Премьер-министрдің орынбасары – Мәдениет және ақпарат министрі Аида Балаеваның төрағалығымен Инновацияларды дамыту жөніндегі кеңестің (Инновациялық штабтың) алғашқы отырысы өтті. Оған Ғылым және жоғары білім министрі Саясат Нұрбек, мемлекеттік органдардың өкілдері, облыстар мен қалалар әкімдерінің орынбасарлары және бизнес қауымдастық өкілдері қатысты.
Инновациялық штаб Премьер-министрдің тапсырмасы бойынша құрылды. Оның негізгі міндеті – инновациялық қызмет саласындағы ведомствоаралық үйлестіруді қамтамасыз ету және технологиялық басымдықтарды айқындау.
Отырыста Қазақстан Республикасында инновацияларды дамытудың тұжырымдамалық мәселелері қаралды. Құжатта мемлекеттік қолдау құралдарын жетілдіру, өңірлік инновациялық жүйелерді дамыту және кадрлық әлеуетті арттыру жөніндегі шаралар көзделген.
Нәтижесінде инновациялық белсенділікті арттыруды, Қазақстанның Жаһандық инновациялар индексіндегі позициясын нығайтуды, сондай-ақ жаңа салаларды дамытуды, жоғары технологиялық жұмыс орындарын құруды және жоғары қосылған құны бар өнім экспортын ұлғайтуды қамтамасыз ететін тиімді инновациялық жүйе қалыптастырылмақ.
Жаңа модельдің негізгі идеологиялық қағидаты – «Ғылым арқылы инновация» тәсілінен «Инновация арқылы ғылым» тәсіліне көшу. Бұл тәсіл дайын озық технологияларды игеріп, оларды бейімдеу арқылы ұлттық ғылымды дамытуға негізделген. Яғни мемлекет процесті емес, нақты нәтижені қаржыландырады.
Штаб отырысының қорытындысы бойынша Инновацияларды дамыту тұжырымдамасының негізгі тәсілдері мақұлданып, мемлекеттік органдарға, әкімдіктерге және бизнес-сектор өкілдеріне тұжырымдама жобасын кейіннен бекіту үшін нақты ұсыныстар енгізу тапсырылды.
Сондай-ақ бизнес тарапынан технологиялық сұраныстарды айқындау мақсатында барлық мүдделі тараптардың қатысуымен өңірлерде ғылыми-технологиялық сессиялар өткізудің кестесін бекіту тапсырылды.
