Сыр сүлейлерінің мұрасын жаңғыртуға зор үлес қосқан жырау, Қазақстанның еңбек сіңірген қайраткері, профессор, «Парасат», ІІІ дәрежелі «Барыс» ордендерінің, «Тұран» сыйлығының иегері, Қызылорда облысының құрметті азаматы Алмас Нұрмаханұлы Алматов 70 жасқа толды.
Мемлекет басшысы Қасым-Жомарт Кемелұлы Қызылордада өткен Ұлттық құрылтайдың қорытынды отырысында: «Жалпы, «Сыр елі – жыр елі» деп бекер айтылмайды. Қорқыт ата заманынан жалғасып келе жатқан жыраулық-жыршылық және күйшілік өнер бұл аймақта кең қанат жайған. Жиенбай, Нұртуған, Нартай сынды саңлақтар негізін қалаған жыршылық мектептерді бүкіл еліміз біледі» деп атап өтті.
Алмас ағамыз атадан балаға мирас болған төл өнерді жаңа дәуірге жеткізуге ерен еңбек сіңірді. Дәстүрлі жыр орындаушыларды маман етіп даярлау арқылы өткеннің өзегін бүгін мен ертеңге жалғады. «Дәстүрлі өнер – жыр» мамандығының мемлекеттік стандартын, оқу жоспарын, әдістемелік кешенін жасады.
Осылайша Сыр бойындағы жыраулық өнердің көшін бастап, ізіне шәкірт ертті. «Өнер мұрагер ұрпақтарымен ғана дәстүрлі сипат алады» деген ұстанымын өзгертпей, жастарды жыршылыққа баулыды.
Бүгінде өңіріміздегі дәстүрлі жыр мектептерінің мақамдарын, тағылымға толы термелерді, жыр-дастандарды зердесіне тоқыған жыршылар өнерде, ғылымда өз орындарын тапты. Түркі елдерінде, Еуропа мемлекеттерінде өткен фестивальдерге қатысып, ұлтымыздың өнерін танытты. Сыр сүлейлерінің шығармаларын әлемдік сахналарда орындады. Топырағына құт дарыған аймағымыздағы жыраулық өнердің алтын арқауы үзілмей, халық ауыз әдебиеті мен музыкалық мұраны бағалайтын көрерменнің көзайымына айналды.
Бізге тарихымыз бен әдебиетіміздегі жыраулар бейнесін, олардың ұлт алдындағы қызметін, орны мен өнегесін көрсеткен Алмас ағамызды мерейлі жасымен құттықтаймыз! Деніңізге саулық, отбасыңызға амандық тілейміз! Ұлтымыздың жыр мұрасын түгендеп, келер ұрпақтың кәдесіне жарату жолында сіңірген еңбегіңіз жемісті болғай!
Нұрлыбек НӘЛІБАЕВ,
Қызылорда облысының әкімі
