БҰҰ-ның Бала құқықтары жөніндегі қорының мәліметінше, аймақтағы мектептердің 90 пайыздан астамы қираған не зақымданған.
Бұл туралы ЮНИСЕФ өкілі Джеймс Элдер Женевадағы БҰҰ бөлімшесінің апталық брифингінде мәлім еткен.
Оның сөзінше, ұзаққа созылған қақтығыстар Газа секторындағы бір буын баланың білім алу мүмкіндігін шектеп отыр. Осылайша, Газа секторындағы білім беру инфрақұрылымы бұрын-соңды болмаған шығынға ұшырады.
ЮНИСЕФ деректеріне сай, қазіргі уақытта мектеп жасындағы балалардың шамамен 60 пайызы дәстүрлі оқу процесіне қатыса алмайды. Көптеген оқу орны жарамсыз күйге түскен, ал кейбірі толықтай қираған.
– Жағдай әсіресе, ең кіші жастағы балалар үшін аса күрделі. 5 жасқа дейінгі 335 мыңнан астам бала ерте даму қызметтерінің бұзылуына байланысты ауыр тәуекел аймағында қалған. Бұл болашақта олардың психологиялық, әлеуметтік және білімдік дамуына ұзақ мерзімді салдар тигізуі мүмкін, – деді Джеймс Элдер.
ЮНИСЕФ өкілдері Газадағы білім беру жүйесін қалпына келтіру тек инфрақұрылымды жөндеумен шектелмейтінін, ең алдымен балалардың қауіпсіздігі мен тұрақты оқу ортасын қамтамасыз ету қажет екенін айтып, дабыл қағуда.
