Арал өңірі үшін балық шаруашылығын дамыту – ғасырлар бойы қалыптасқан өмірлік маңызы зор кәсіп. Сол бір берекелі жолдан жаңылмаған жаңалау жұрты өткен жылдың соңында «Қарашалаң балық» зауытының ашылуына куә болды.
Қазіргі уақытта ауданда жылдық қуаттылығы 30 000 тоннаға жуық 10 балық өңдеу зауыты жұмыс істейді. Оның ішінде 2 кәсіпорын Еуропа нарығына шығуға мүмкіндік беретін «Еврокод» сертификатына ие. Бұдан бөлек, 15-ке жуық сұрыптау және сақтау цехтары халық игілігіне қызмет етуде.
Жаңа «Қарашалаң балық» зауыты — өндірістік қуатты жылына 6 мың тоннаға арттырып, ішкі нарықты сапалы өніммен қамтамасыз етуге бағытталған маңызды жоба. Зауыттың жалпы құны 500 млн теңгені құрайды. Оншақты адамды тұрақты жұмыспен қамтитын бұл табысты кәсіпорын өңір экономикасының өркендеуіне үлес қоспақ.
Айта кетейік, қазіргі таңда кәсіпшілік балық аулау мақсатында балықтың 16 түрі ауланады. Өткен жылы ауданда 6726 тонна балық өңделіп, оның 3475 тоннасы алыс-жақын шет елдерге экспортталды. Шет мемлекеттерге экспортталатын балық өнімі 2024 жылдың есепті кезеңімен салыстырғанда 608 тоннаға артық экспортталып 121, 2 пайызға ұлғайып отыр.
Салада қолдан балық өсіру жұмыстары да қарқынды дамып келеді.
