E-Qazyna порталында Алматыдағы «Байсат» көтерме-бөлшек сауда орталығы сатылмады.
Бірақ, сауда-саттық басталған сәтте сату нысаны бойынша тіркелген қатысушылар жоқ болғандықтан, аукцион тоқтатылған.
Негізінен, аукцион кеше сағат 10:00-де өтуі керек еді. Базардың бастапқы бағасы – 28 639 882 000,00 теңгеге бағаланды.
Осыған дейін отандық БАҚ-тар базарды «Қайтарылған активтерді басқару компаниясы» сатылымға шығарғанын жарыса жазған болатын.
Айта кетейік, 2024 жылдың қаңтарында Қазақстандағы ең ірі бизнесмендер қатарын толықтыратын Қайрат Сатыбалдының ұлына тиесілі «Байсат» базарының бір бөлігі мемлекетке қайтарылған-ды. Алматы қаласының мамандандырылған ауданаралық экономикалық соты «Алматы жылу» холдинг кешенінің (қазіргі «Байсат» базары) мүлкімен жасалған барлық мәмілені жарамсыз деп тану туралы шешім шығарды.
Сотқа дейінгі тергеу аясында Қайрат Сатыбалдының «Байсат» базарының басым бөлігін өз еркімен қайтарып бергені көпшілікке мәлім.
Фото: eadaily.com
