Жастар ең төмен жалақы алатын санатта қалып отыр. Қазақстанда биылғы орташа айлық еңбекақы 410 965 теңге болды. Алайда мемлекеттік және жекеменшік сектор арасындағы айтарлықтай алшақтық еңбек нарығындағы теңсіздікті айқын көрсетіп отыр. Ұлттық статистика бюросының дерегінше, мемлекеттік қызметтегі орташа жалақы — 335 574 теңге. Ал жеке сектордағы еңбекақы — 468 130 теңге. Яғни бизнес саласында табыс шамамен 40 пайызға жоғары. Сарапшылар мұны нарық талаптарына икемделетін жекеменшік компаниялардың бәсекеге қабілетті қызметкерлерді ұстап қалу ниетімен байланыстырады. Жас ерекшелігі де маңызды фактор. Ең жоғары табыс 35-44 жастағы мамандарға тиесілі — орта есеппен 455 мың теңге. Ал еңбек жолын енді бастаған жастар айына небәрі 280 мың теңге көлемінде жалақы алады. Салалар бойынша да айырмашылық айқын. Қаржы, ақпараттық технологиялар және басқару бағытындағы қызметкерлер елдегі ең жоғары табысқа ие: жалақысы 1,2-1,55 миллион теңге шамасында. Керісінше, балық шаруашылығы, мектепке дейінгі тәрбие және әлеуметтік қызмет салаларында еңбекақы 158-232 мың теңгенің аралығында ғана. Мамандардың айтуынша, интеллектуалды және технологиялық бағыттағы жұмыс күші қарқынды дамып, жоғары бағаланып келеді. Ал әлеуметтік сала әлі де экономикалық ынталандырудан сырт қалып, табыс деңгейі төмен күйінде тұр.
Қазақстанда мемлекеттік жалақы бәсекеге ілесе алмай жатыр
