Қазақстанда ауыл шаруашылығы өнімдерінің бағасы тағы да көтерілді. Ұлттық статистика бюросының мәліметінше, биылғы қазан айында өткен жылдың дәл осы кезеңімен салыстырғанда баға өсімі орта есеппен 6,3 пайызды құрады. Ең жоғары қымбаттаған өнімдер қатарында жаңа жиналған жүзім бар – бір жылда бағасы 35 пайызға жуық өскен. Жылыжай қияры 22,7 пайызға, картоп 20,2 пайызға, бұрыш 16,4 пайызға, жылыжай қызанақтары 15 пайызға қымбаттады. Сонымен бірге, рапс, күнбағыс, сафлор және өзге де тұқымдардың бағасы 15–22 пайыз аралығында көтерілгені байқалады. Көкөністерден бөлек, мал және құс шаруашылығы өнімдері де айтарлықтай қымбаттаған. Үй құстарының бағасы бір жылда 28,7 пайызға, шошқа – 23,9 пайызға, ірі қара – 18,9 пайызға, жылқы – 9,9 пайызға, қой – 8,6 пайызға өсті. Сүт пен жұмыртқа бағасының да жоғарылауы жалғасуда. Дегенмен кейбір дақылдар арзандаған: күріштің бағасы 10,5 пайызға, тары 4,5 пайызға, қарақұмық 4 пайызға төмендеген. Бидай, арпа мен сұлыда да аздаған төмендеу байқалды. Ауыл шаруашылығы нарығындағы баға ахуалы тұтынушыларға жыл сайын ауырлап барады. Баға өсімін тоқтататын нақты тетік әзірге көрінбейді.
Қазақстанда көкөніс пен тұқым бағасы күрт өсті
