Қазақтың дарынды жазушысы, драматург, публицист, қазіргі қазақ әдебиетін қалыптастырушылардың бірі Ж.Аймауытовты біз көркем шығармалы арқылы білеміз. Оның қазақ топырағына алғаш психология ғылымын әкелгенін және психологтар мен мұғалімдерге көмекші құралдар жазғанын көпшілік оқырман біле бермес Айта кетейік, «Психология» ол уақытта осы салада қазақ тілінде жазылған тұңғыш еңбек болды.
«Психология» 1926 жылы баспадан шықты. Ғалым еңбекті психология ғылымын терең түсініп, ұғынықты тілде жазып шыққан. Бұл кітап қазақ әдебиетінің 20-ғасырдың басындағы ірі өкілі Ж.Аймауытовтың елеулі бір қырын – ғалымдық- ағартушылығын көрсетеді.
Жуырда «Сенімен Болашақ» РҚБ Қызылорда облыстық филиалы «Жүсіпбек айлығы» аясында «Психолог көзімен: Жүсіпбек Аймауытовтың «Психология» еңбегі» тақырыбында кездесу өткізді. Оған психологтар қатысты. Шараның негізгі мақсаты – қазақтың көрнекті қаламгері Ж.Аймауытовтың психология саласындағы мұрасын зерделеу, оның еңбегіндегі құнды ой-тұжырымдарды қазіргі кәсіби көзқарас тұрғысынан талқылау.
Кездесуде Жүсіпбек Аймауытовтың өмірі мен қызметі, шығармашылығы, әсіресе «Психология» атты еңбегі осыдан 100 жыл бұрын жазылса да өзектілігін жоймағаны айтылды. Осы еңбегінде ол адамның жан дүниесі, сезімі, түйсігі, мінезі, ойлауы, ерік-жігері және тұлғалық қалыптасуына қатысты маңызды мәселелерді қозғайды. Шара барысында психологтар аталған тақырыпқа тоқталып, кітаптағы ойларды бүгінгі психология тұрғысынан саралауға тырысты.
Әр маман өзіне әсер еткен тұжырымдармен бөлісіп, кәсіби тәжірибесі негізінде пікір білдірді. Осылайша, бір кітаптың айналасында бірнеше кәсіби көзқарас тоғысып, мазмұнды пікір алмасу болды. Кітапты бірге оқу – өткеннің мұрасын қайталау ғана емес, ұлттық ой мен қазіргі кәсіби тәжірибенің арасындағы байланысты жаңаша пайымдау мүмкіндігі.
«Жүсіпбек айлығы» аясындағы кездесу қаламгердің асыл мұрасын дәріптеп қана қоймай, оның бүгінгі күндегі мәнін түсінуге, кәсіби тұрғыдан зерделеуге және ойды жалғастыруға бағытталды.
Жүсіпбек оқылды. Ой жалғасты.
Сенімен Болашақ РҚБ Қызылорда облыстық филиалы.
