Қоршаған ортаның тазалығы мен елді мекендердің көркейуі – қоғамның ортақ жауапкершілігі. Осы бағыттағы жұмыстарды жүйелі түрде жүргізу мақсатында елімізде «Таза Қазақстан» жалпыұлттық экологиялық жобасы жүзеге асырылуда.
Мемлекет басшысы Қасым-Жомарт Тоқаев «Таза Қазақстан» бастамасы уақытша науқан емес, әр азаматтың күнделікті дағдысы мен өмір салтына айналуы қажет екенін атап өткен. Президенттің айтуынша, тазалық ең алдымен әр адамның өзінен, отбасынан, ауласынан басталады.
«Таза Қазақстан» аясындағы жұмыстар қоршаған ортаны абаттандыру, аумақтарды тазалау, көгалдандырумен ғана шектелмейді. Жобаның маңызды бағыты – тұрғындардың экологиялық мәдениетін қалыптастыру, табиғатқа жанашырлықпен қарау және қоғамдық орындарда тазалық сақтау жауапкершілігін арттыру. Президент бұл бастаманың қоғамда жаңа мәдениет пен қоғамдық этиканы қалыптастыруға ықпал ететінін атап көрсеткен.
Тазалық – бір мекеменің немесе белгілі бір топтың ғана міндеті емес. Әр тұрғын өз ауласы мен көшесінің тазалығына үлес қосып, табиғи ресурстарды ұқыпты пайдаланып, қоршаған ортаға құрметпен қараған жағдайда ғана бұл бастама нақты нәтижесін береді.
Сондықтан «Таза Қазақстан» – айналаны тазарту ғана емес, елге деген жанашырлықты нақты іспен көрсету. Таза көше, таза аула, жасыл желек пен ұқыпты қоғамдық орта – баршаға ортақ мәдениеттің көрінісі. Тазалықты күнделікті өмір салтына айналдыру арқылы біз келер ұрпаққа таза әрі жайлы орта қалыптастырамыз.
Мысалы, Қызылорда қаласы, Сырдария тұрғын ауданындағы көпқабатты №10-шы үйдің тұрғындары ауланы абаттандырудың ерекше үлгісін көрсетті. Көршілер өз күшімен үйдің аумағын жасыл желекке айналдырды. Әсіресе, есіктің алдындағы жабайы жүзіммен көмкерілген күнқағарлар керемет әсер қалдырады.
Бұл бастама тұрғындар арасындағы ауызбіршілікті арттырып, ортақ мүлікке ұқыпты қарау мәдениетін қалыптастыратыны белгілі. Өздері баптаған бақты күтіп-ұстауға көршілер белсенді атсалысады.
Бүгін егілген бір тал бірнеше жылдан кейін саяға айналады. Әр отбасы өз ауласына жас шыбық отырғызса, оның өзі үлкен олжа. Сондықтан ауламызға күтім жасап, көгалдандыруға, тазалыққа баршамыз үлес қосуымыз қажет.
