Қызылорда қаласы, Орда school жеке мектебінде оқушылар арасында буллингтің, құқық бұзушылықтың, зорлық-зомбылықтың және әлімжеттіктің алдын алу, оқушылардың құқықтық сауаттылығын арттыру, қауіпсіз әрі қолайлы орта қалыптастыру мақсатында 8-9 сынып оқушылары арасында профилактикалық кездесу өткізілді.
Кездесуге Қалалық полиция басқармасының Отбасылық-тұрмыстық зорлық-зомбылыққа қарсы күрес бөлімшесінің инспекторы, полиция аға лейтенанты Серікқызы Арайлым және ҚПБ ЖПҚБ ҚҚБ ЮПБ-нің полиция аға лейтенанты Д.Рысбеков қатысты.
Кездесу барысында мамандар оқушыларға буллинг ұғымының мәнін түсіндіріп, оның негізгі түрлеріне тоқталды. Атап айтқанда, физикалық, психологиялық, сөзбен кемсіту, әлеуметтік ортадан шеттету және әлеуметтік желілердегі кибербуллинг сияқты әрекеттердің балаға кері әсері туралы түсіндірме жұмыстары жүргізілді.
Сонымен қатар оқушыларға құқық бұзушылықтың салдары, өз құқықтары мен міндеттері, заң талаптарын сақтау, қоғамдық тәртіпті бұзбау және өз әрекеттеріне жауапкершілікпен қарау жөнінде маңызды ақпараттар берілді.
Мамандар жасөспірімдерге әлеуметтік желілерді пайдалану кезінде сақ болу, бейтаныс адамдармен қарым-қатынаста жеке қауіпсіздік ережелерін сақтау, жеке мәліметтерін жарияламау және күмәнді жағдайларға тап болған кезде ересектерден көмек сұрау қажеттігін атап өтті.
Кездесу барысында оқушыларға зорлық-зомбылық пен буллингке куә болған жағдайда бейжай қалмай, дер кезінде ата-анаға, сынып жетекшісіне, мектеп психологіне немесе тиісті мамандарға хабарласудың маңыздылығы түсіндірілді.
Сондай-ақ оқушылар арасында өзара сыйластық, достық қарым-қатынас, толеранттылық, бір-біріне қолдау көрсету және өзгелердің жеке шекарасын құрметтеу құндылықтарын қалыптастыруға ерекше назар аударылды.
Кездесу соңында оқушылар өздерін қызықтырған сұрақтарын қойып, мамандардан қажетті жауаптар алды.
Осындай профилактикалық кездесулердің басты мақсаты – әр оқушының өзін қауіпсіз сезінуіне жағдай жасау, құқықтық мәдениетін қалыптастыру және қандай да бір келеңсіз жағдайдың алдын алу.
Буллингке жол бермейік!
Әр бала – құрметке, қамқорлыққа және қауіпсіз ортаға лайық!
Айнұр Шуақбаева,
Директордың тәрбие ісі жөніндегі орынбасары.
