Президент «Таза Қазақстан» жалпыұлттық экологиялық акциясы жайлы айтқан сөзінде ел жастарына сенім артып, олардың болашағынан зор үміт күтетінін айтты.
– Мен Қазақстан жастарын, яғни сіздерді дәл сондай жүрегі таза, адал азаматтар деп есептеймін. Бұл сөздің мағынасын кең тұрғыдан алып қарасақ, тазалық ластықтың алдында ешқашан ұтылмайды, тазалық бәрін жеңеді. Бұл да – өмірдің өзі растаған мәңгі ақиқат дүние. «Таза Қазақстан» жобасының мақсаты – елімізді көркейту, жұртымызды ортақ іске жұмылдыру арқылы ынтымақ-бірлігімізді күшейту. Бүгінде Қазақстанның әр аймағында ауқымды жұмыс істеліп жатыр. Жыл басынан бері еліміз бойынша 600-ден астам түрлі экологиялық іс-шара өтті. Осы маңызды жұмысқа 7 миллион адам қатысты, 130 мыңнан астам гектар жер тазартылды. Елімізде 1,3 миллион тал егілді, – деді Қасым-Жомарт Тоқаев.
Сырдариялық белсенді жас Олжас Жалғасұлы ел Президентінің бастамасы аясында жасалып жатқан жұмыстардың қарқыны қуантарлықтай екенін айтады. Оның айтуынша, «Таза Қазақстан» тек тазалықты ғана ту етпейді, елдің көп мәселесін шешіп, жақсы дағдыға баулып жатыр.
– Бұл – өте жақсы бастама. Біз Мемлекет басшысының тапсырмасының нәтижесінде ауыл-ауылды, елді мекендерді жасыл-желекке айналдырып, белсенді жастардың басын қосып, туған жердің алдындағы перзенттік парызымызды орындауымыз керек. Қазір елдегі белсенді жастар бірігіп тал егіп, айналаны жасыл-желекке айналдыруға атсалысуда. Мешіт, қоғамдық орындардың қоршауын сырлап, айналасын әктеп жатыр. Мұның барлығы үлгі аларлық бастама екені даусыз. Алдағы уақытта да осы белсенділікпен тер төгіп, еңбек ете берсек, Қазақстанды жасыл-желекпен көмкеріп, орманға айналдыруға болады, – дейді белсенді жас.
