Кейіпкеріміз Файзрахман Қаржауов ауылда өмірге келді, ыстығына күйіп, суығына тоңып, еңбекпен ерте есейді. Басқалар секілді арман қуып алысқа қол сермеуді қажет деп таппады. Адамға бақытты болу үшін не керек болса, ауылда соған қол жеткіздім деп есептейді.
Ол Қазалы ауданының бұрынғы «Қызылту», қазіргі Жалаңтөс баһадүр ауылында дүние есігін ашты. Ата-анасы қарапайым шаруа адамдар еді. Сегізжылдықты бітірген соң көп ойланбастан автомектепте оқып, жүргізуші куәлігін алды да, автобазада еңбек жолын бастап кетті. 1975-1977 жылдары Украинада авиациялық кешенде жүргізуші болып Отан алдындағы борышын өтеп келді. Әскерден келу бойына «Октябрьдің 40-жылдығы» совхозының Дәуренбек ағасы меңгеруші болып еңбек ететін Шөлқұм аймағындағы 1-фермасына көлік жүргізуші болып жұмысқа қабылданды.
Файзрахманның міндеті – әрқайсысында мыңға жуық қойы бар жиырма төрт отарды қысы-жазы аралап жүріп су, жем, жайылымға шыға алмай қалған маусымда шөп жеткізу, сақманда қаракөл тасуға атсалысу, қақаған қыс пен аптап ыстықта жиырма төрт шопанның отарларының бар мұқтаждығын өтеуге қолдан келгеннің бәрін жасау. Бірінші фермада бес жыл еңбек ете жүріп сенімнен шығып, Дәуренбек ағасының алғысы мен батасын алды.
Бұдан кейін дәл осы жұмысты совхоздың Шәкен ауылына қарайтын 2-фермасында Әскер ағасының қарамағында жүріп айна-қатесіз қайталады. Кеңес одағы ыдырап, шаруашылық тарағанша адал еңбек етіп, «ісің құрсын» деген сөз естіген жоқ.
– Одан кейін шаруашылық тарап жұмыссыз қалдым, қысы-жазы Қарақұм беткейін шиырлаған жылдар із-түзсіз кетпей, денсаулық та сыр берді, – дейді ол. – 2005 жылы тәуекелге бел буып мал шаруашылығын өркендетуге арналған 6 пайыздық несиеге қол жеткізіп, 20 бас жылқы алып жеке қожалықтың жұмысын бастап кеттім. Бейнетсіз зейнеттің рақатына кенеле алмайсың. Содан бергі жылдар еткен еңбегімнің есесін толық қайтарды демей-ақ қояйын, отбасымызбен жұмыла жасаған жұмысымыз өз нәтижесін бергендей. Сол 20 бас жылқының өсіп-өнген төлімен несиемді жаптым. Екі мың гектар жайылымдық жерім, шаруашылыққа арналған жүк көлігім, тракторым, жаздай шөп шабатын техникам, қыс айларына жабдықталған жылқы тұратын жайлы қорам, 50-60 бастай жылқым бар. Қыста қорада тұрады, жазда жайылымға шығарамыз, ауру-сырқауын емдеп, қатарға қосамыз. Бағуға оңтайлы болу үшін, төлдерін ет бағытына жаратып, одан артық ұстамауға тырысамын.
Файзрахман Қаржауовтың аудан экономикасының, кәсіпкерлік саласының өркендеуіне қосқан үлесі үшін Қазалы ауданы әкімінен, Шәкен ауылы әкімінен алған Алғыс хаттары еңбегінің еленіп келе жатқанын айғақтайды.
Жолдасы Марияш Ниеталиева – өмірдің де, кәсіптің де бейнеті мен зейнетін қатар көріп келе жатқан айнымас көмекшісі. Ауылды азық-түлікпен қамтитын шағын дүкені бар. Төрт қыз, екі ұлының бәрін аяқтандырып, үй-жайлы қылып несібелерін қолдарына ұстатқанын Құдай берген кәсіптің, адал еңбектің арқасы деп қабылдайды. Солардан өрген сегіз немеренің де қызығын көруден үмітті.
Еңбек еткеннің еңсесі биік болатынын іс-әрекеттерімен дәлелдеп келе жатқан, көпке үлгі қылуға тұрарлық, қарапайым отбасының еңбегі еселеніп, береке-бірлігі артып, лайым арман-мақсаттары орындала берсін.
Әлімжан ҚИЯС.
Қазалы ауданы.
