Су шаруашылығы қызметкерлерінің атаулы мерекесінде халықты уақыт өткен сайын адамзаттың аса зәру мұқтаждығына айналып келе жатқан тіршілік нәрімен қамтамасыз етіп жүрген сала қызметкерлері еңбектеріне лайық марапат иеленді. Солардың қатарында «Елеулі еңбегі үшін» төсбелгісін алған «Арал-Сарбұлақ» топтық су құбыры кәсіпорнының Аралқұм насос станциясындағы аға шебері Темірхан Ахметов те бар.
Ол 1967 жылы 7 қарашада Приаралье кеңшарының Мойнақ ауылында дүниеге келген. Қарақұмда өмір бойы қой баққан «Еңбек Қызыл Ту» орденді әкесі Рамберді Ахметұлы мен анасы Бибіхатша балаларын барынша адал, бауырмал, еңбеккеш болуға баулыды. Отбасында «баланы жастан» деген темір тәртіпке негізделген тәрбие жемісін бермей қалмады. Осылайша соқпақты да тоқпақты өмір жолын жүріп өткен ата-ананың бүгінде үйлі-баранды болып, өздері ата-әжеге айналған 3 ұл, 2 қызы еңбекпен шынықты. Сондай қатқыл тәрбиенің арқасында Темірхан да талапшыл, ізденімпаз, бейнеткеш болып өсті.
Бала күнінде сабақтан бос уақытта жайлаудан қыстауға, қыстаудан жайлауға көшкенде қой төлдетуде, қырқым, қаракөл дайындау пунктінде төлді іріктеу, сою, терісін кептіріп, сорттауда, кейін өздері дайындаған қаракөл терісін Шымкентке апарып өткізіп келу сапарында әкесіне жәрдемші болды. «Бұл біздің еңбекке бейім болып өсуімізге, азамат болып қалыптасуымызға үлкен әсер етті» дейді ол.
Темірхан 1985 жылы Аралқұмдағы орта мектепті бітіріп Қарақұм кеңшарында бір жылдай жұмыс істеген соң, 1986-1988 жылдары Ресейдің Иркутск қаласында әскери борышын өтеп келді. 1988-1991 жылдар аралығында Қызылорда қаласындағы политехникумда оқып, инженер-құрылысшы мамандығын алып шықты. Оқу бітірген кезден бастап Қарақұм кеңшарында жұмысшы, аға жұмысшы, шебер болып еңбек етті. Кеңшар тараған соң Аралқұмға қоныс аударды. Ал 2003 жылдан «Арал-Сарбұлақ» топтық су құбыры мекемесіне жұмысқа орналасты.
– Бала күнімнен еңбекке ерте араласқан мені жаңа ортам жатырқаған жоқ, – деп бастады әңгімесін кейіпкерім. – Міне, содан бергі жылдар аралығында су шаруашылығы саласында қатардағы жұмысшы, машинист, аға машинист, шебер, аға шебер қызметтерін мүлтіксіз меңгердім. Мұны маңдай тердің қайтарымы ретінде мақтан тұтамын. 2006 жылы Қорқыт ата университетінде оқып, инженер-құрылысшы мамандығын алып шықтым. Қазір жүздеген шақырымды қамтитын «Арал-Сарбұлақ» су құбырын пайдалану басқармасына қарайтын мемлекеттік коммуналдық кәсіпорнының «Бердікөл» және «Қосаман» су құбырының екі су тартқысындағы 12 су көтергіш сорап станциясының, хлорлау қондырғыларының, 38 ұңғыманың Арал және Қазалы халқын сумен қамтамасыз етіп отырғанын осындағы жалпақ жұрт біледі.
Біздің басты мақсатымыз – халықты тәулік бойы сапалы ауызсумен қамтамасыз ету. Осы салада мен Аралқұм елді мекенінің насос станциясына жауаптымын. Бір бағыты Қазалыға қарай, мына жағы Қамыстыбас, Аманөткел, Бөген, Қаратерең, Жаңақұрылыс, тағы басқа бағыттарды қадағалап жүремін. Бұл жұмыстың қиындығы мен жауапкершілігі зор. Кәсіби мерекеге орай еңбегімді елеп жатқан басшыларыма да алғысым шексіз.
Жолын тосып отыратын үй шаруасындағы жолдасы Жаңыл Ахметова, Аралқұм елді мекені әкімшілігінде статист болып еңбек ететін ұлы Қуаныш пен медбике болып қызмет жасайтын келіні Зәуреш, төрт немересі – Темірханның бар байлығы.
Арал ауданы әкімінің «Су шаруашылығының үздігі» дипломы, ҚР Экология және табиғи ресурстар министрінің Құрмет грамотасы, «Нұра» топтық су құбыры кәсіпорнының Құрмет грамотасы, кешегі 9 шілде күнігі кәсіби мерекеге орай берілген «Елеулі еңбегі үшін» төсбелгісі Темірханның еңбегінің еленгенін айғақтайды.
Әлімжан ӘЛКЕБАЙҰЛЫ.
Әйтеке би кенті.
