Ә.Тәжібаев атындағы облыстық кітапханада Сыр перзенті, ақын, қаламы жүйрік журналист Бекжан Сүлейменовтің «Ауылдың дәмі» кітабының таныстырылымы өтті. Туған жердің табиғаты, тыныс-тіршілігі, онда ғұмыр кешкен қарапайым адамдардың көзге түсе бермейтін, тек көңілмен ғана сезетін қадір-қасиеті туралы шынайы сезім шап-шағын әңгіме-эсселерге арқау болған жаңа кітап оқырманға жол тартты.
Сыр өңірінің зиялы қауымы қатысқан рухани шараны Мәдениет саласының үздігі, «Тұран» сыйлығының иегері, педагогика ғылымдарының магистрі, белгілі жырау Серік Жақсығұлов жүргізді. Шараға Қазақстанның еңбек сіңірген қайраткері, Мәдениет қайраткері, «Парасат» және ІІІ дәрежелі «Барыс» ордендерінің иегері, профессор, жырау Алмас Алматов, қоғам қайраткерлері Рзақұл Нұртаев, Мейрамбек Исаев сынды ел ағалары, «Qyzylorda» телеарнасы директорының орынбасары Айсұлу Қасымова және «Сыр бойы» газетінің жауапты хатшысы Дәуіржан Елубаев сияқты әріптес, замандастары қатысып, қалам иесінің шығармашылығы жайлы айтты, жаңа кітабына ой-пікірлерін ортаға салды. Сондай-ақ, ауылдастары, бірге өскен жора-жолдастары да қаламгердің көңіл түкпіріндегі аядай ғана аяулы мекені – Қызылдың қиясындағы Кекіреліде өткен балалық шағындағы қызықты сәттерді әсерлі әңгімелеп, кітап авторына сый-құрмет көрсетті.
Кітапқа журналист Бақытжан Қосбармақов алғы сөз жазыпты. «Бір көзе алтын» атты кіріспеде ол «Б.Сүлейменовтың мына кітабын оқып шыққаннан кейін ат басындай демей-ақ қояйын, бір көзе алтын тауып алғандай қуандым» деп бастапты. Олжаға кенелгенімізге біз де қуандық. Расында «Ауылдың дәмін» рахаттанып, тіліңіз мүдірмей оқисыз. Бойыңызды балдәурен балалық, жастық шаққа деген, ауылды сағыныш кернейді.
Кітапта автордың туған жер, ауыл өмірі, елдік ұстаным, ұлттық құндылықтар, сондай-ақ, қарапайым адам бойындағы адалдық, адамгершілік туралы толғаныстары мен тағылымды естеліктері қамтылған. Жалпы қазақ ауылының тыныс-тіршілігі, ұрпақ тәрбиесі, ұлттық болмыс пен рухани сабақтастық тақырыбы тарқатылған. Айтса айтқандай, «Үшінші якорь», «Абай көшесінің алыбы», «Қаппардың конторы», «Біздің шал», «Бөлекбайдың кенжесі», «Дәуржанның дәурені», «Көңіл дастарханы» сияқты әңгімелер алыста қалған ауыл өмірін көз алдыңа әкеліп, көңілге жылылық ұялатады.
Кеште жыраулар Қасарбек Кәрібаев, Әділхан Қуаңбаев Сыр сүлейлері шығармаларынан жырласа, жас жыршы Тоғжан Бақытова кітап авторы, ақын Б.Сүлейменовтің туған жерге арнауын орындап, жиылған көптің ыстық ықыласына бөленді. Кездесу соңында сөз алған Бекжан Сүлейменов шығармаларының жазылуына әсер еткен негізгі идея туған жерге деген терең сағыныш екенін айтты.
– Менің өміріме өзіндік қолтаңбасын қалдырған адамдар мен бала кезден санамды сілкілеген оқиғалар жайлы ара-тұра жазып жүргеніме де едәуір уақыт болған екен. Осы дүниелердің басым бөлігі фейсбук әлеуметтік желісіндегі парақшамда жарияланды. Жанымды шұғылалы нұрға бөлеген жүрегімдегі осы жылы естеліктердің азамат болып қалыптасуыма септігі тигенін, өмір мектебінің оқу-әдістемелік құралы болғанын мойындаймын. Маған әсер еткен, мені шыңдаған өмір баспалдақтары өзіндік қиындығымен, өзіндік ерекшелігімен жадымда жаңғырып жатыр, – деді ол. Сөзін түйіндей келе ауылдан жырақта жүрген әрбір адам осындай сезімді басынан кешетінін айтып, осы тақырыптағы өлеңдерін оқыды.
Соңында кеш қонақтары автордан қолтаңба алып, естелік суретке түсті.
