Мемлекет басшысының бастамасымен жүзеге асырылып жатқан республикалық «Таза Қазақстан» экологиялық акциясы аясында Барсакелмес мемлекеттік табиғи қорығында қоршаған ортаны қорғау, табиғи аумақтарды тазалау, көгалдандыру және экологиялық мәдениетті қалыптастыру бағытында ауқымды жұмыстар жүргізілді.
Акцияның басты мақсаты – табиғатқа жанашырлықпен қарау мәдениетін қалыптастыру, елді мекендердің санитарлық жағдайын жақсарту, табиғи аумақтардың тазалығын сақтау және тұрғындардың экологиялық жауапкершілігін арттыру болып табылады.
Акция аясында қорық қызметкерлері тұрақты түрде сенбіліктер ұйымдастырып, мекеме аумағында және оған іргелес аумақтарда санитарлық тазалық жұмыстарын жүргізді. Қалдықтар жиналып, аумақтар абаттандырылып, қоршаған ортаның тазалығын сақтау бойынша кешенді шаралар жүзеге асырылды.
Табиғатты қорғау шараларының маңызды бағыттарының бірі көгалдандыру жұмыстары болды. Қорық қызметкерлерінің, жастардың, еріктілердің және серіктес ұйымдардың бірлескен еңбегінің нәтижесінде шамамен 1000 түп ағаш және бұта көшеттері отырғызылды. Бұл жұмыстар өңірдің экологиялық ахуалын жақсартуға, жасыл желек қорын көбейтуге және табиғи ортаны сақтауға бағытталды.
Сонымен қатар «Мөлдір бұлақ» акциясы ұйымдастырылып, табиғи су көздерінің маңын тазалау және олардың санитарлық жағдайын жақсарту жұмыстары атқарылды. Табиғи ресурстарды қорғау мен ұтымды пайдалану мәселелеріне ерекше назар аударылды.
Табиғатты қорғау – әрбір азаматтың ортақ борышы. Осы бағыттағы жұмыстар алдағы уақытта да жалғасып, туған жердің табиғи байлығын сақтау мен қоршаған ортаның тазалығын қамтамасыз етуге өз үлесін қоса береді.
А.ЕСЕНОВА,
Барсакелмес мемлекеттік табиғи қорығының
бас экологиялық ағарту инженері.
