5 маусым – Дүниежүзілік қоршаған ортаны қорғау күніне орай Арал аудандық Оқушылар үйінде республикалық «Парктер шеруі – 2026» табиғат қорғау акциясының жабылу салтанаты өтті.
Іс-шараға Барсакелмес мемлекеттік табиғи қорығының қызметкерлері, білім беру ұйымдарының өкілдері, оқушылар мен экология саласына қызығушылық танытқан жастар қатысты. Салтанатты жиынды Барсакелмес мемлекеттік табиғи қорығының директоры Х.Қаниев пен Арал аудандық Оқушылар үйінің директоры Г.Садықбаева ашып, қатысушыларды Дүниежүзілік қоршаған ортаны қорғау күнімен құттықтады.
Шара барысында «Парктер шеруі – 2026» табиғат қорғау акциясы аясында белсенділік танытқан оқушылар, педагогтер және серіктес ұйымдар марапатталды. Өз сөзінде қорық директоры табиғатты қорғау ісіне үлес қосқан барлық қатысушыларға алғысын білдіріп, экологиялық мәдениетті қалыптастырудағы мұндай шаралардың маңыздылығына тоқталды.
Сонымен қатар іс-шара аясында Оқушылар үйінің жазғы тынығу лагерінде демалып жатқан балаларға арналған танымдық кездесу ұйымдастырылды. «Мемлекеттік инспектордың жұмысы» тақырыбында өткен кездесуде қорықтың күзет қызметінің негізгі міндеттері түсіндіріліп, мемлекеттік инспекторлардың ерекше қорғалатын табиғи аумақтарды қорғау, жануарлар дүниесін сақтау және табиғат қорғау заңнамасының сақталуын қамтамасыз ету бағытындағы қызметі туралы ақпарат берілді.
Балалар табиғатты қорғау саласындағы мамандықтардың ерекшеліктерімен танысып, өздерін қызықтырған сұрақтарға жауап алды. Мұндай кездесулер жас ұрпақтың табиғатқа деген сүйіспеншілігін арттырып, қоршаған ортаға жауапкершілікпен қарауға тәрбиелеуге ықпал етеді.
«Парктер шеруі – 2026» акциясының жабылу салтанаты табиғатты қорғау бағытындағы жұмыстардың қорытындысын шығарып қана қоймай, экологиялық ағарту ісінің маңызын тағы бір мәрте айқындаған тағылымды шара болды.
Л.Амитова,
Барсакелмес мемлекеттік табиғи қорығы.
