Бүгін Қызылорда облысы Жаңақорған кентіндегі А.Абдуллаев атындағы зияткерлік мектеп-интернатында Ғазиз Байтасов атындағы «Жас сақшы» полиция сыныбының ашылу рәсімі өтті.
Салтанатты іс-шараға Қызылорда облысы Полиция департаменті ардагерлер кеңесінің төрағасы Әмірбек Шаймағамбетов, Жеке құраммен жұмыс жөніндегі басқармасының бастығы Асқар Балқожаев қатысты.
Жиында «Жас сақшы» полиция сыныбының негізгі мақсат-міндеттері туралы айтылды. Атап айтқанда, жас ұрпақты отансүйгіштікке тәрбиелеу, құқықтық мәдениетті қалыптастыру, тәртіп пен жауапкершілікке баулу, сондай-ақ полиция қызметінің беделін арттыру бағытындағы атқарылып жатқан жұмыстар кеңінен насихатталды.
Сондай-ақ, шара аясында ант қабылдау рәсімі өткізіліп, сынып құрамына қабылданған 15 оқушыға арнайы куәлік табысталды.
Ғазиз Байтасов – ел тыныштығы мен қоғамдық қауіпсіздікті қорғау жолында ерлікпен қаза тапқан ержүрек сақшы. Ол 1971 жылы Жамбыл облысында дүниеге келген. Ішкі істер органдарындағы қызметінде кәсібилігімен, батылдығымен және адамгершілік қасиеттерімен ерекшеленіп, әріптестерінің құрметіне ие болды.
2011 жылғы 12 қарашада Тараз қаласында орын алған лаңкестік оқиға кезінде полиция капитаны Ғазиз Байтасов аса қауіпті қылмыскерді тоқтату барысында ерекше ерлік көрсетті. Қылмыскерді құрықтау кезінде ол өз өмірін қатерге тігіп, бейбіт тұрғындардың қауіпсіздігі үшін жан аямай күресті. Қарулы лаңкес өзін-өзі жарып жіберген сәтте ол ауыр жарақат алып, ерлікпен қаза тапты.
Жанқиярлық ерлігі үшін Ғазиз Байтасов ҚР Президентінің Жарлығымен «Халық қаһарманы» атағына ие болды. Оның ерлігі мен жарқын бейнесі ел жадында мәңгі сақталады. Шарада қатысушылар қаһарман сақшының рухына тағзым етті.
– «Ер есімі – ел есінде. Батыр полицейдің өмір жолы мен ерлігі жас ұрпақты отансүйгіштікке, батылдыққа және адалдыққа тәрбиелейді. Осындай «Жас сақшы» сыныптарының ашылуы – келешек ұрпаққа тағылым беретін маңызды бастама, – деді полиция подполковнигі Асқар Балқожаев.
Қонақтар ел тыныштығы жолында қызмет етудің маңыздылығына тоқталып, оның өнегелі өмір жолы мен ерлігі кейінгі жас буын үшін әрдайым үлгі екенін атап өтті. Антына адал Ғазиз Байтасовтың ерлігі жас ұрпақ жадында мәңгі сақталары сөзсіз.
Қызылорда облыстық Полиция департаментінің
баспасөз қызметі
Оқи отырыңыз:
