«Парктер шеруі» халықаралық экологиялық акциясы аясында Барсакелмес мемлекеттік табиғи қорығының қызметкерлері Қызылорда қаласында кең көлемді экологиялық ағарту жұмыстарын жүргізді. Іс-шаралардың негізгі мақсаты – жастардың экологиялық сауаттылығын арттыру, табиғатты қорғау мәдениетін қалыптастыру және ерекше қорғалатын табиғи аумақтардың маңызын түсіндіру.
Экологиялық іс-шаралар 1 сәуір күні Қызылорда медициналық колледжінде бастау алды. Кездесу барысында студенттерге қоршаған ортаны қорғау, сирек кездесетін жануарлар мен өсімдіктерді сақтау мәселелері түсіндірілді. Студенттер табиғатты қорғау бағытындағы маңызды мәліметтермен танысып, өз ойларын ортаға салды. Сол күні экологиялық ағарту жұмыстары «Болашақ» университетінде жалғасты. Университет студенттерімен өткен кездесуде климаттың өзгеруі, антропогендік факторлардың табиғатқа әсері және экологиялық жауапкершілік тақырыптары кеңінен талқыланды.
2 сәуір күні іс-шаралар Қорқыт ата атындағы Қызылорда университетінде өтті. Студенттермен өткен кездесуде қорықтардың рөлі, биоалуантүрлілікті сақтау және табиғатты ұқыпты пайдалану мәселелері қозғалды. Жастар табиғатты қорғаудың маңызын терең түсініп, өз ұсыныстарын білдірді.
Кейін қорық қызметкерлері «Сыр медиа» ЖШС ұжымында болып, құстарға арналған көрмеге қатысты. Көрме аясында құстар әлемінің әсемдігі мен оларды қорғаудың өзектілігі насихатталды. 3 сәуір күні экологиялық шаралар Қызылорда құрылыс және бизнес колледжінде жалғасын тапты. Студенттермен кездесуде экологиялық мәдениет, табиғатты қорғау және қоршаған ортаға жауапкершілікпен қарау мәселелері талқыланды.
Сол күні №6 Сужиков атындағы орта мектебінде де мазмұнды кездесу ұйымдастырылды. Мектеп оқушылары қорықтың қызметімен танысып, табиғатты аялаудың маңызын түсінді. Өткізілген іс-шаралар «Парктер шеруі» акциясының қоғам үшін маңызын тағы бір мәрте айқындады. Мұндай кездесулер жастардың экологиялық санасын қалыптастырып, табиғатқа деген жанашыр көзқарасты нығайтуға ықпал етеді. Табиғатты қорғау – баршамызға ортақ міндет. Осындай игі бастамалар арқылы болашақ ұрпаққа таза әрі бай табиғи ортаны сақтап қалуға мүмкіндік бар.
Н.Сахиев,
Барсакелмес мемлекеттік табиғи қорығы
