«Бір ауыл – бір өнім» жобасының ресми логотипі өзгертіліп, жаңа графикалық бейнесі бекітілді. Жаңартылған нұсқа бірнеше мағыналық және мәдени элементтердің үйлесіміне негізделген.
Логотиптің негізгі композициясы үш маңызды идеяға сүйеніп жасалған. Оның басты элементтерінің бірі қазақтың дәстүрлі «Қазмойын» ою-өрнегі. Бұл – ұлттық ою-өрнек өнеріндегі зооморфтық мотивтерге жататын элемент. Құс мойнының әсем иірімін бейнелейтін өрнек сұлулықты, нәзіктікті, үйлесімді қозғалысты және еркіндік идеясын білдіреді.
Логотиптің гүл тәрізді пішімі сакура гүлін еске түсіреді. Бұл таңдау кездейсоқ емес. Жоба Жапонияның халықаралық ынтымақтастық агенттігінің (JICA) қолдауымен жүзеге асырылып келеді. Сакура – Күншығыс елі мәдениетінің басты символдарының бірі. Ол көктемді, жаңаруды, өмірдің нәзік сұлулығын бейнелейді. Қысқа мерзім ғана гүлдейтін сакура өмірдің өткіншілігін, әр сәттің құндылығын және табиғи жаңару кезеңдерін меңзейді.
Сонымен қатар логотиптің жалпы формасы мен иірімдері «Атамекен» ҰКП ресми логотипімен үндестіріліп жасалған. Палата логотипінде бауырластық, бірлік және ынтымақтастық идеялары жатыр. Шеңбер құра ұстасқан адамдар бейнесі ұйымшыл қауымдастықты білдірсе, күн бейнесі өмір мен жаңа бастамалардың нышаны, ал дөңгелек пішін қозғалысты әрі көшпелі мәдениеттің сабақтастығын символдайды.
Осылайша жаңа логотип ұлттық дәстүр, халықаралық серіктестік және кәсіпкерлік қауымдастық құндылықтарын бір арнаға тоғыстырған заманауи символ ретінде ұсынылды.
