Мемлекет басшысының бастамасымен жүзеге асырылып жатқан «Таза Қазақстан» жалпыұлттық экологиялық акциясы ел көлемінде кең қолдау тауып, халықтық сипат алған ірі қозғалысқа айналды. Бұл бастама тек қоршаған ортаны тазартуға бағытталған науқан емес, ол — қоғамның экологиялық мәдениетін қалыптастырып, әр азаматтың туған жерге деген жауапкершілігін арттыруды көздейтін маңызды жоба. Акция аясында еліміздің түкпір-түкпірінде тазалық жұмыстары жүргізіліп қана қоймай, табиғатты аялау мен тарихи-рухани құндылықтарды қорғау мәдениеті де кеңінен насихатталуда.
Осы игі бағдарлама аясында және 18 сәуір — Халықаралық ескерткіштер мен тарихи орындарды қорғау күніне орай Қазалы ауданы, Лақалы ауылында мәдениет қызметкерлері сенбілік ұйымдастырды. Ауылдағы рухани және тарихи маңызы зор орындарда тазалық және абаттандыру жұмыстары жүргізілді.
Алдымен, жаңадан бой көтерген мешіттің айналасы қоқыстан тазартылып, ретке келтірілді. Бұл — тек санитарлық талаптың орындалуы емес, рухани ортаны құрметтеудің, имандылық пен тазалықты қатар ұстаудың көрінісі.
Сонымен қатар, ауылдың өткені мен өнегесін айшықтайтын «Құрмет алаңы» да тазартылды. Мұнда майдангерлерге арналған жәнее ел ішінен шыққан тұлғалардың есімдері қашалған тақталар, тарихи жәдігерлер орналасқан. Бұл киелі кеңістік ұрпақ пен тарихты жалғап тұрған рухани көпір іспетті.
Мәдениет қызметкерлері мұндай жұмыстардың маңызына ерекше тоқталды. Олардың айтуынша, бұл — бір күндік науқан емес, туған жердің тарихын қастерлеуге, жас ұрпақтың бойына отансүйгіштік пен жауапкершілік дарытуға бағытталған тұрақты үрдіс.
Клуб меңгерушісі Мейрімхан Мақсатбай: «Таза Қазақстан» акциясы аясындағы бұл сенбіліктің басты мәні — тек тазалық емес, жастарға рухани-мәдени мұраны таныту. 18 сәуір — тарихи ескерткіштерді қорғау күні болғандықтан, біз киелі орындарға айрықша назар аудардық. Тарихқа құрмет ең алдымен тазалықтан басталады» деп атап өтті.
Бұл бастама адам мен табиғаттың, өткен мен бүгіннің арасындағы сабақтастықты айқындаған тағылымды іс болды.
Лақалы жұртының бұл игі қадамы алдағы уақытта да жалғасын табары сөзсіз. Өйткені туған жерге деген сүйіспеншілік — өткенге тағзымнан, ал болашаққа деген жауапкершілік — тазалықтан басталады.
Айнұр Әлімбаева,
Лақалы ауылы
