Бүгін Өңірлік коммуникациялар қызметінің ақпарат алаңында өңірдегі спорт саласының даму қарқыны, соның ішінде биыл ғана жеке басқаруға берілген қызылоралық “Қайсар” футбол клубының стратегиялық даму жоспары мен негізігі міндеттері талқыланды. Бұдан бөлек, брифинг барысында білім және әлеуметтік салаларға байланысты өзекті мәселелер де қозғалды.
Бүгінде өңірімізде спорт саласын қарқынды дамыту аясында ауқымды жұмыстар атқарылуда. Мемлекет басшысының тапсырмасымен аймақ басшысының ерекше қолдауымен облыста 2022 жылдан бері заманауи үлгідегі 24 спорт кешені пайдалануға берілді. Бүгінде Қызылорда қаласының сол жағалауында ірі спорт нысандары бой көтерді. Атап айтқанда, «Самұрық-Қазына» ұлттық әл-ауқат қорымен бірлесіп салынған теннис орталығы, 11 мың орындық халықаралық стандарттарға сай «Қайсар Арена» стадионы және ерекше қажеттілігі бар жандарға арналған Инклюзивті спорт орталығы ел игілігіне берілді. Сонымен қатар, құны 20,5 млрд теңгені құрайтын көпбейінді «Қызылорда Арена» кешенінің құрылысы қарқынды жүргізіліп, осы жылы пайдалануға беру жоспарланып отыр.
Өздеріңіз білетіндей, бірнеше күн бұрын әлеуметтік желілерде «Қайсар» футбол клубының қаржылық мәселесіне қатысты теріс бағыттағы ақпарат шыққан болатын. Осыған байланысты қызылордалық «Қайсар» футбол клубының қазіргі стратегиялық жоспары мен негізгі міндеттерін баяндаймыз.
Жарты ғасырдан астам тарихы бар клубтың ойыншыларын осы уақытқа дейін 35 бапкер жаттықтырды. Сол жылдар аралығында жергілікті команда Қазақстан кубогын екі мәрте жеңіп алды, Еуропа лигасының жолдамасын иеленді.
2019 жылы облыстық бюджеттен жергілікті клубқа 4 млрд теңге көлемінде қомақты қаржы бөлінген болатын. Бұл сол кезеңдерде облыстар бойынша салыстырмалы түрде ең көп бөлінген қаржы болды.
2020 жылы клубқа облыстық бюджеттен 2,6 млрд бөлінсе, 2021 жылы «Қайсардың» құрамына 9 легионер алынды. Алайда бәсекелестіктің жоғары болуы және футболшылардың кәсіби деңгейінің төмендігі салдарынан жергілікті команда чемпионатта 19 ұпай еншілеп, турнирлік кестеде 13-орынға жайғасып, Бірінші лигаға төмендеді.
2022 жылы Нұрлыбек Машбекұлы облысқа басшы болып келгеннен кейін жергілікті командаға Премьер-Лигаға өтуге тиісті талаптар қойылды. Сол жылы бөлінген 605 млн теңгемен жергілікті команда бірінші лигада ойын өрнегін көрсетіп жүрген болатын.
2023 жылы аталған клубқа облыстық бюджеттен 1,2 млрд теңге бөлініп, дұрыс жоспардың, қойылған тиісті талаптартыңнәтижесінде жергілікті команда Бірінші Лигадан Премьер-Лигаға өтті.
2024-2025 жылдар аралығында команда облыстық бюджеттен бөлінген 1,2 млрд теңгемен жасыл алаңда өнер көрсетті.
Өздеріңіз білетіндей, «Қайсар» футбол клубының 2020 жылдан бастап қалыптасқан 753 млн.теңге көлемінде берешегі бар болатын. Қазіргі кезге дейін клуб берешегінің жартысы жабылды.
Мемлекет басшысы футбол клубтарын жекешелендіруге қатысты тиісті тапсырма берген болатын.
Президент тапсырмасына сәйкес, елімізде алғашқылардың бірі болып қызылордалық «Қайсар» футболклубы 2025 жылдың соңында жеке басқаруға өтті. Клубтың жаңа иесі – «TAU Group LTD» компаниясының басшысы, жерлесіміз Исламғали Қозбақов. Биылғы жылдан бастап жергілікті клуб жеке кәсіпкердің басқаруына берілді.
Осы ретте, алдағы 5 жылда «Қайсар»футбол клубына облыстық бюджеттен белгілі бір көлемде қаржы қарастырылады. Осы уақыт аралығында қаржы көлемі кезең-кезеңімен азайып, бес жылдан кейін облыстық бюджеттен қаржыландыру толық тоқтатылады. Биыл жергілікті клубқа бөлінген қаржы 200 млнтеңгеге дейін қысқартылды.
Биыл жергілікті «Қайсар» футбол клубына облыстық бюджеттен бөлінген 995 млн.теңгеге мемлекеттік сатып алу заңына сәйкес конкурс өткізіліп, жеңімпаз атанған «TAU Group LTD» компаниясынақаржы бөлінді. Қазіргі таңда инвестор 18 млрд.теңгеге «Қайсар» академиясын салуда. Биылғы жылы негізгі база мен жаттығатын 3 алаңды салып, күз айларында пайдалануға беру жоспарланып отыр. Қазір құрылыс жұмыстары қарқынды жүруде. Ал толық кешенді 2027 жылдың соңына дейін пайдалануға беру жоспарлануда.
Бұл жоба клубтың ұзақ мерзімді дамуына бағытталған негізгі инвестициясы. Жалпы клубтың стратегиясы 5-10 жылдық жүйелі өсімге бағытталған. Жоба аясында 7 толық өлшемді және 2 балалар алаңының құрылысы, сонымен қатар жабық манеж бен ойыншыларды қалпына келтіруге арналған медициналық орталық қарастырылған. Бұл академия қабырғасынан тәрбиеленіп шыққан спортшылар болашақта жергілікті «Қайсар» футбол клубын биік шыңдардан көрсетеді деп нық сеніммен айта аламыз. Біз бұл бағытта жасөспірімдер футболын әрдайым қолдап келеміз, алдағы уақытта да қолдайтын боламыз!
Мемлекет басшысының тапсырмасымен аймақ басшысының ұйымдастыруымен 11 мың орындық «Kaysar Arena» стадионы бой көтерді.
Құны 26,5 млрд теңгені құрайтын жаңа стадионның жасыл алаңы халықаралық стандарттарға сай жабдықталған. Жаңа стадионның негізгі ерекшелігі — УЕФА классификациясы бойынша – IV санатты категориясына ие. Бірегей нысанның құрылысы бір жыл үш айда толық аяқталды.
Осы ретте жаңадан салынған стадионды күтіп ұстау шығындарының жылдық көлемі 500 млн теңгені құрайды. Бұл қаржы толықтай жеке инвестордың өзінің қаражаты, бюджеттен оған ешқандай қаржы бөлінбеген.
Жаңа стадион, Қайсар арена секілді заманауи нысандардың барлығы әлеуметтік салалардан талан-таражға түсіп жатқан қаржыларды тоқтатудың нәтижесінде үнемделген, қайтарылған қаражаттарға жасалды.
Үшіншіден, шет мемлекеттерден келетін жалдамалы ойыншылардың (легионерлер) шығындарын негізіненжеке инвестор өзі өтеп отыр.
Жиын барысында соңғы уақытта әлеуметтік желілерде қызу талқыланған мәселелердің бірі «Қайсар» клубын қаржыландыру тақырыбы да назардан тыс қалмады. Кейбір желі қолданушылары клубқа бөлінетін қаржыны қысқартып, оны мұғалімдер мен жұмысшылардың жалақысын арттыруға бағыттау жөнінде пікір білдірген болатын. Осыған байланысты жауапты сала басшылары нақты түсіндірме берді.
— Бүгінгі күні Қызылорда облысында мемлекеттік және жеке кәсіпорындар бойынша жалақы қарызына қатысты ірі мәселе тіркелмеген. Яғни, еңбекақы төлеу мәселесі тұрақты бақылауда және бұл бағытта жүйелі жұмыстар жүргізілуде. Сондықтан спорт саласына бөлінген қаржы әлеуметтік міндеттемелерге кері әсер етпейді, — деді облыстық жұмыспен қамтуды үйлестіру және әлеуметтік бағдарламалар басқармасының басшысы Ғабит Жаңабаев.
Жалпы, Сыр өңірінде спорт саласын дамыту жүйелі түрде жүзеге асып келеді. Инфрақұрылымның жаңаруы, жекеменшік инвестициялардың тартылуы және басқару тетіктерінің жетілдірілуі спорт саласынының ғана емес, өңірдегі білім саласының да жаңа кезеңге қадам басқанын көрсетеді.
— Бүгінгі күнге дейін барлық мемлекеттік білім беру ұйымдарында жалақы бойынша берешек тіркелмеген. Жеке мектептерге қатысты Қазақстан Республикасы Оқу-ағарту министрлігінің арнайы бұйрығы қабылданған. Аталған құжатқа сәйкес, өткен жылдың қыркүйек-желтоқсан айларында 37 мектеп конкурсқа қатысып, олардың тек екеуі ғана белгіленген талаптарға толық сәйкес келген. Осыған байланысты аталған білім беру ұйымдарына мемлекеттен бөлінетін қаржы толық көлемде аударылды. 2026 жылға арналған кезекті конкурс нәтижесінде 24 өтініш қаралып, оның ішінде 11 мектеп талаптарға сай деп танылды. Қазіргі таңда бұл мектептерге тиесілі қаржы уақытылы аударылып отыр. Сонымен қатар, әлеуметтік желілерде білім саласына бөлінген қаржының қысқартылып, өзге салаларға бағытталып жатқаны туралы тараған ақпарат шындыққа сәйкес келмейді. Білім саласынан үнемделген қаражат өзге бағыттарға емес, тек осы саланың өзекті мәселелерін шешуге жұмсалады, — деді облыстық білім басқармасы басшысының міндетін атқарушы Асхат Қанатов.
Мемлекет басшысының тапсырмасына сәйкес, «Қайсар» футбол клубы 2025 жылдың соңында жеке басқаруға берілген болатын. Қазіргі уақытта клубтың жаңа иесі — «TAU Group LTD» компаниясының басшысы, жергілікті кәсіпкер Исламғали Қозбақов.
Клуб иесі өз сөзінде бұл жауапкершілікті үлкен сенім ретінде қабылдайтынын атап өтті: Сондай-ақ, жанкүйерлердің сенімінен шығу үшін барынша еңбек етіп, басты міндеттерді орындайтынын жеткізді.
– «Қайсар» — тек клуб емес, халықтың сенімі. Біздің басты мақсатымыз — команданың ойын нәтижесін жақсарту, жанкүйерлер үмітін ақтау және болашаққа мықты негіз қалыптастыру. Сол үшін біз академия құрылысына басымдық беріп отырмыз. Негізгі үш бағытымыз бар: стадионды өзін-өзі қамтамасыз ететін деңгейге жеткізу, жанкүйер сенімін нығайту және мықты футбол мектебін қалыптастыру. Осы бағытта нақты жұмыстар басталып кетті. Қазіргі таңда 18 млрд теңгеге заманауи футбол академиясының құрылысы жүргізілуде. Жоба аясында бірнеше толық өлшемді футбол алаңы, жабық манеж және медициналық оңалту орталығы салынбақ. Биыл алғашқы үш алаң мен жаттығу базасын пайдалануға беру жоспарланып отыр, – деді Исламғали Қозбақов.
Айта кету керек, жаңа «Қайсар Арена» стадионы УЕФА талаптарына сай IV санатты нысан ретінде танылған. Бұл – өңір спорты үшін маңызды жетістік. Сонымен қатар, стадионды күтіп-ұстау шығындары да жеке инвестор есебінен жабылып отыр.
