Бүгін «Руханият» орталығында «Әділетті және прогрессивті Қазақстанның халықтық Конституциясы үшін!» жалпыұлттық коалициясының мүшелері аудан жастарымен кездесті.
Аумақтық коалиция жетекшісі Ғазиз Әліш жаңа Конституцияда ғылым, білім және инновацияларды мемлекеттік саясаттың басты стратегиялық басымдықтарына айналдырудың маңызын атап өтті. Оның сөзінше, құжаттың негізгі мақсаты – адам капиталын дамыту.
«Бүгінде мемлекет ХХІ ғасырдың негізгі құндылығы – адамға инвестиция салуға басымдық беріп отыр. Жаңа Конституцияның преамбуласында ғылым, білім және инновациялардың рөлі нақты көрсетілген. Бұл елдің тұрақты дамуына және адам әлеуетін арттыруға жол ашады. Жастар үшін бұл білім беру бағдарламаларын кеңейту, ғылыми зерттеулерді қолдау және сапалы білім алу мүмкіндігін қамтамасыз ететін инфрақұрылымның дамуын білдіреді. Алдағы референдум әр азаматқа өз таңдауын жасауға және елдің дамуына үлес қосуға мүмкіндік береді. Сондықтан жастар бейжай қалмай, азаматтық ұстанымдарын көрсетіп, белсенді қатысуы қажет», – деді Ғазиз Әлмәмбетұлы.
Кездесуге қатысқан өзге спикерлер де Ата Заңды уақыт талабына сай жаңартуды қолдады. Коалиция мүшелері Талайлы Бөріқұлақов пен Күмісбай Серікбаев Конституция жобасы құқықтар мен бостандықтарды нығайтуға, адам капиталын дамытуға, жастардың мүмкіндіктерін кеңейтуге бағытталғанын, сондай-ақ еліміздегі барлық азаматтың, әртүрлі әлеуметтік және кәсіби топтардың мүддесі мен сұранысын қамтитынын атап өтті.
Кездесудің соңында жастар өкілдері алдағы референдумға қатысуға және Конституция жобасын қолдауға дайын екендерін білдірді.
