2026 жылғы 20 ақпанда Астана қаласындағы «ADD Table Tennis Center Astana» базасында Қазақстан спорт федерацияларының тарихында тұңғыш рет базалық жүрек-өкпе реанимациясы (ЖӨР) бойынша сертификатталған курс ұйымдастырылып, спорт нысанына заманауи автоматты сыртқы дефибриллятор (AED) орнатылды.
Аталған бастама Қазақстан үстел теннисі федерациясы корпоративтік қоры мен University Medical Center нұсқаушылар командасының бірлесуімен жүзеге асты. Оқыту үдерісі European Resuscitation Council халықаралық стандарттарына толық сәйкес жүргізілді.
Практикалық курсқа жаттықтырушылар, төрешілер және спорт орталығының қызметкерлері қатысты. Қатысушылар заманауи манекендер арқылы жүрек-өкпе реанимациясының алгоритмдерін пысықтап, AED құрылғысын қолдану тәсілдерін меңгерді. Нәтижесінде халықаралық үлгідегі сертификаттарға ие болды.
Әлеуметтік жауапкершілік пен қазақстандық спортты қолдау аясында Mindray компаниясы орталыққа заманауи автоматты сыртқы дефибриллятор табыстады. Айта кету керек, AED аппаратының болуы халықаралық жарыстар өткізу кезіндегі міндетті талаптардың бірі саналады. Спорт нысанын осындай жабдықпен қамтамасыз ету – қолданыстағы қауіпсіздік стандарттарына сай келіп қана қоймай, шұғыл көмек көрсетуге дайындық деңгейін айтарлықтай арттырады.
Іс-шараға Қазақстан Республикасының Бас штаттан тыс анестезиолог-реаниматологы Тимур Сайранұлы Капышев қатысып, бұл бастаманың жоғары кәсіби және сараптамалық деңгейін ерекше атап өтті. Оның айтуынша, спортшылар арасындағы кенеттен болатын жүрек тоқтауы мәселесі әлем бойынша өзекті, ал алғашқы минуттарда уақтылы көрсетілген ЖӨР мен AED қолдану адам өмірін сақтап қалу мүмкіндігін бірнеше есеге арттырады.
Қазақстан үстел теннисі федерациясының вице-президенті Жаннұр Қалиғожин бұл тәжірибені еліміздің өзге өңірлеріне кезең-кезеңімен енгізу жоспарланып отырғанын жеткізді. Атап айтқанда, спорт нысандарында AED аппараттарын орнату және базалық реанимациялық көмек көрсету бойынша міндетті оқыту жүйесін қалыптастыру көзделуде.
Спортшылардың, жаттықтырушылардың және көрермендердің қауіпсіздігін қамтамасыз ету – Қазақстандағы спортты дамытудың заманауи моделінің ажырамас бөлігі. Астанада басталған бұл қадам ұлттық спорт жүйесінде қауіпсіздік мәдениетін жаңа деңгейге көтеретін маңызды бастама болмақ.
