Қазіргі заманда адам өмірінің қарқыны жылдамдап, күйзеліс пен мазасыздық күнделікті құбылысқа айналып барады. Осындай кезеңде психологиялық денсаулықты сақтау – әрбір адамның ғана емес, тұтас қоғамның маңызды міндеті. «Жан ауырса – тән азады» демекші – ішкі күйзеліс адамның жалпы жағдайына әсер етеді. Сол себепті, тән саулығына мән бергендей, жан саулығына да яғни психологиялық денсаулыққа да мән бергеніміз жөн.
Психологиялық денсаулық дегеніміз – адамның өз эмоциясын басқара алуы, күйзеліске төтеп беруі, айналасындағы адамдармен дұрыс қарым-қатынас орната білуі және өмірдегі қиындықтарға бейімделуі мен қиын жағдайда шешім шығара білуі.. Көп жағдайда біз дене саулығына көбірек мән беріп, жан дүниеміздегі күйді елеусіз қалдырып жатамыз. Алайда, ішкі тепе-теңдік бұзылса, оның салдары физикалық денсаулыққа да әсер ететінін ұмытпауымыз керек.
Күйзеліс – үнсіз қауіп!
Мамандардың айтуынша, ұзаққа созылған күйзеліс ұйқысыздыққа, шаршауға, ашушаңдыққа, тіпті созылмалы ауруларға әкелуі мүмкін. Кейбір адамдар мұндай жағдайды «уақытша шаршау» деп қабылдап, дер кезінде көмекке жүгінбейді. Бұл – ең үлкен қателіктің бірі.
Психологиялық қиындықтар әлсіздіктің белгісі емес. Керісінше, өз мәселесін мойындап, көмек сұрай білу – саналы әрі жауапты қадам. Психологиялық саулықты қалай сақтаймыз?
Психологтар психологиялық денсаулықты нығайту үшін бірнеше қарапайым, бірақ тиімді кеңестерді ұсынады:
Демалыс пен жұмыстың тепе-теңдігін сақтау.
Үнемі жұмыс істеу адамды қажытады. Демалуға уақыт бөлу – еркелік емес, қажеттілік.
Эмоцияны ішке жинамау.
Көңілді мазалаған ойды сенімді адаммен бөлісу жанға жеңілдік береді.
Физикалық белсенділік.
Жаяу жүру, спортпен шұғылдану күйзелісті азайтады.
Әлеуметтік байланыс.
Отбасы мен достардың қолдауы – психологиялық тұрақтылықтың тірегі.
Маман көмегінен қашпау.
Психологқа бару ұят емес, бұл – өз денсаулығына жауапкершілікпен қарау.
Қоғамдық көзқарас өзгеруі керек.
Өкінішке қарай, кей ортада психологиялық көмекке жүгінуге әлі де күмәнмен қарайды. Мұндай көзқарас адамдарды жалғыздыққа итермелейді. Сондықтан психологиялық сауаттылықты арттыру, бұл тақырыпты ашық талқылау – уақыт талабы.
Психологиялық дені сау адам – өзіне сенімді, еңбекке қабілетті, айналасына мейірімді болады. Ал мұндай адамдардан құралған қоғам да берік әрі тұрақты болмақ.
Жан саулығын сақтау – болашаққа салынған инвестиция. Әр адам өз психологиялық жағдайына көңіл бөліп, қажет кезде көмек сұраудан қорықпаса, қоғамымыз әлдеқайда сау болары сөзсіз. Осы орайда, қала аймағындағы барлық емханаларда құпиялық қағидаларын сақтай отырып, психолог мамандарының жұмыс күндері тегін қабылдау жүргізетінін айтқым келеді.
Сілтаев Мақсат Нұркенұлы,
№5 қалалық емхананың психолог маманы
