Табиғатпен тілдесіп, оның тынысын түсіну – кез келген адамға бұйыра бермейтін ерекше сезім. Ал табиғатты қорғауды өмірінің бір бөлшегіне айналдыру – үлкен жауапкершілік пен жүректің қалауын талап ететін жол.
Орманшылар күні – табиғатты аялаған, жасыл желекті қорғаған, туған жердің табиғи байлығын сақтауға бар күшін арнаған жандарға құрмет көрсететін ерекше күн. Орманшы дегенде көз алдымызға ең алдымен ну орман, алып ағаштар елестейді. Бірақ табиғатты қорғау ұғымы тек орманмен шектелмейді. Ол – шөл даланың әрбір талын, жануарлардың әрбір түрін, құстардың мекенін, табиғи ландшафттың тұтастығын қорғау. Осы тұрғыдан алғанда, Арал өңірінің
табиғатын қорғап, Барсакелместің қайталанбас әлемін сақтап жүрген әрбір маманның еңбегі айрықша.
Барсакелмес – табиғаттың өзіндік заңдылығы қалыптасқан, тарихы мен тағдыры Арал өңірімен біте қайнасқан ерекше мекен. Бұл жерде табиғаттың қаталдығы мен сұлулығы қатар өрілген. Шөл даланың аптап ыстығына қарамастан тіршілігін жалғастырған сексеуіл, кең далада еркін жортқан құлан, қарақұйрық пен ақбөкен – осы өлкенің табиғи байлығының бір бөлігі ғана.
Оларды сақтау – бір күндік жұмыс емес. Бұл – күн сайынғы еңбек, табандылық және табиғатқа деген шынайы сүйіспеншілік. Табиғатты қорғау – үнсіз жасалатын ерлік. Кейде оның нәтижесі бірден
көрінбейді. Бір көшеттің өсіп, үлкен ағашқа айналуына жылдар керек. Бір жануар түрінің санын қалпына келтіруге ұзақ уақыт қажет. Ал адамның табиғатқа деген көзқарасын өзгерту үшін одан да көп еңбек керек.
Бірақ табиғатты қорғаушылар үшін ең үлкен марапат – қоршаған ортаның амандығы. Бүгінгі таңда «табиғатты болашақ ұрпаққа қалай жеткіземіз?» деген сұрақ әрқайсымызды ойландыруы тиіс.
Өйткені табиғат – бізге тиесілі дүние емес. Біз оны ата-бабамыздан мұраға алған жоқпыз, біз оны келер ұрпақтан уақытша алғандаймыз. Барсакелместің кең даласында еркін жортқан құландар, көктемде бүр жарып, жазда шөлге төтеп беретін өсімдіктер, аспанда қалықтаған құстар – бізден
кейінгі ұрпақтың да көруіне тиіс табиғи мұра.
Табиғатқа қызмет ету – мамандық қана емес, жүрек таңдаған жол. Осы жолда еңбек етіп жүрген барлық орманшылар мен табиғат қорғаушыларына мықты денсаулық, қажымас қайрат, еңбектеріне береке тілеймін!
Табиғатымыз тұнық, даламыз көркем, орманымыз жайқалып, жануарларымыз еркін мекендейтін күндеріміз көп болсын.
Орманшылар күні құтты болсын!
Алма Есенова,
Барсакелмес мемлекеттік табиғи қорығының бас инженері.
