Сол жағалауда аймақ тұрғындарына жоғары медициналық көмек көрсететін 300 орындық көпбейінді аурухананың құрылысы қарқынды жүргізілуде. Жалпы аумағы 7 гектарды құрайтын заманауи нысан Мемлекет басшысының тапсырмасы аясында ел игілігіне берілмек.
Кешен құрылымы жағынан бір-бірімен тығыз байланысқан 10 функционалды блоктан тұрады. Бір ауысымда 100 адам қабылдайтын емхана, операция және реанимация бөлімдері, физиотерапия, қабылдау, әкімшілік блоктары, асхана мен ірі жиындар өткізуге арналған конференция залы болады. Сонымен қатар, алыс аудандар мен ауылдардан келетін науқастардың туыстары үшін арнайы 110 орындық пансионат қарастырылған.
Ауруханада химия және радиотерапия бөлімшелері жұмыс істейді. Бұл жергілікті тұрғындардың өзге аймақтарға немесе шетелге шықпай-ақ заманауи сәулелік ем алуына жағдай туғызады. Орталық ең соңғы үлгідегі жоғары технологиялық медициналық құрылғылармен жарақтандырылады. Радиология бөліміндегі қабырғаның қалыңдығы қауіпсіздік талаптарына байланысты 1 метрге дейін жетеді.
Дәрігерлерге оттегі баллондарын бөлімдер арасында тасымалдаудың қажеті болмайды. Себебі медициналық оттегі аурухананың барлық бөліміне 16 мың метрден асатын құбыр арқылы тікелей жеткізіледі.
Көпсалалы аурухана халықаралық стандарттарға сай келетін жоғары технологиялық диагностикалық және емдеу қызметтерін ұсынатын флагмандық мекемеге айналады. Жаңа нысан аймақ тұрғындары үшін медициналық көмектің сапасы мен қолжетімділігін арттырады.
