Туризм – адамға жаңа мекендерді таныстырып қана қоймай, туған жердің табиғатын, тарихын, мәдениетін тереңірек танып-білуге мүмкіндік беретін ерекше сала. Әрбір саяхат – жаңа әсер, жаңа таным, ал табиғи аумақтарға жасалған сапар – қоршаған ортаға деген жауапкершілікті қалыптастыратын маңызды құрал.
Жыл сайын 27 қыркүйекте туризм күні әлемнің көптеген елдерінде кеңінен аталып өтеді. Бұл күн туризмнің қоғам өміріндегі маңызын айқындап, табиғи және тарихи мұраларды сақтаудың, саяхат мәдениетін дамытудың қажеттілігіне назар аударуға мүмкіндік береді.
Осы тұрғыда, Барсакелмес мемлекеттік табиғи қорығының орны ерекше. Арал өңірінің қайталанбас табиғаты мен өзіндік тарихын бойына сіңірген қорық – табиғат пен адам арасындағы үйлесімділікті сезінуге мүмкіндік беретін бірегей мекен. Барсакелмес – жай ғана географиялық атау емес. Бұл – тарихы терең, табиғаты сырға толы мекен. Қорық аумағының шөлді экожүйелері, өсімдіктері мен жануарлар дүниесі, әсіресе құлан, қарақұйрық, ақбөкен сияқты жануарлар әлемі табиғаттың сан алуан қырын танытады. Мұнда табиғаттың қатал жағдайларға бейімделуі мен тіршіліктің таңғажайып құбылыстарын бақылауға болады.
Қорыққа келген әрбір саяхатшы үшін бұл өлке – ерекше әсер сыйлайтын табиғи кеңістік. Кең дала, шөл ландшафттары, аспанмен астасқан көкжиек, жануарлар дүниесі мен Арал теңізінің тағдырына байланысты тарихи деректер келушілерге табиғатты басқа қырынан тануға мүмкіндік береді.
Бүгінде табиғи аумақтардағы туризмнің басты мақсаты – табиғатты тамашалау ғана емес, экологиялық мәдениетті қалыптастыру. Экологиялық туризм адамға табиғатты тұтыну нысаны ретінде емес, қорғауды қажет ететін құндылық ретінде қабылдауға үйретеді.
Барсакелмес мемлекеттік табиғи қорығында туристік бағыттарды дамыту кезінде де осы қағидаларға басымдық беріледі. Қорықтағы «Құландар ізімен» және «Бутаков мүйісі» туристік маршруттары келушілерге өлкенің табиғи ерекшеліктерін танып, қорықтың табиғатты қорғау бағытындағы қызметі туралы кеңінен мағлұмат алуға мүмкіндік береді.
Туризм күні – саяхаттаудың қуанышын ғана емес, бізді қоршаған табиғи және мәдени құндылықтарға жауапкершілікпен қараудың маңызын еске салатын күн.
Л.Амитова,
Барсакелмес мемлекеттік табиғи қорығының қызметкері.
