Жыл сайын әлемнің түкпір-түкпірінде табиғатты қорғауға бағытталған маңызды экологиялық бастамалардың бірі – “World Cleanup Day” халықаралық акциясы өтеді. Бұл – адамдарды қоршаған ортаны қоқыстан тазартуға ғана емес, табиғатқа деген жауапкершілікті сезінуге, туған жерге жанашырлықпен қарауға үндейтін игі шара.
Биыл әлемдік экологиялық бастама 20 қыркүйекте жалғасын тауып, оған Қазақстан да белсенді түрде атсалысты. Еліміздің әр өңірінде тұрғындар, мемлекеттік мекемелер, қоғамдық ұйымдар мен табиғат жанашырлары бір мақсат жолында бас қосты. Ол мақсат – қоршаған ортаны таза ұстау және табиғатты қорғау мәдениетін қалыптастыру.
Арал ауданында да осы айтулы күнге орай ауқымды сенбілік ұйымдастырылды. Экологиялық шараға Барсакелмес мемлекеттік табиғи қорығының қызметкерлері де белсенді қатысып, туған өлкенің табиғи аумақтарын тазарту жұмыстарына өз үлестерін қосты.
World Cleanup Day – қоқыс жинау күні ғана емес. Бұл – ой тазалығының, жауапкершіліктің және табиғатқа деген құрметтің көрінісі. Бүгін біз табиғатты тазартсақ, ертең табиғат та бізге өзінің таза ауасын, мөлдір аспанын, кең даласын сыйлайды. Әрбір адамның қоршаған ортаға деген шағын ғана жауапты әрекеті үлкен өзгерістердің бастауы бола алады.
Барсакелмес мемлекеттік табиғи қорығының қызметкерлері үшін туған жер табиғатын қорғау – күнделікті кәсіби міндет қана емес, жүрекпен атқаратын жауапты іс. Ұлы даланың табиғи байлығын сақтау – баршамызға ортақ парыз.
Табиғатты қорғау – әрқайсымыздан басталады!
М.Байжігітов,
Барсакелмес мемлекеттік табиғи қорығының қызметкері.
