Қызылорда облысы бойынша ҚАЖ департаментінің қауіпсіздігі барынша төмен №37 мекемесінде жазасын өтеп жатқан азаматтардың барлығы еңбекпен қамтылған.
Олардың қатарында тігін кәсібін меңгеріп жүргендер де бар. Қаладағы “Dalatex” тігін цехында бүгінде 20-ға жуық жазасын өтеуші еңбек етеді. Мұнда арнайы киімдер тігіліп, өндірістік жұмыстар атқарылады. Жазасын өтеушілер жұмыс барысында тігін тігуді, киім бөлшектерін өңдеуді және дайын өнімге қажетті жұмыстарды орындауды үйренеді. Солардың бірі мекемеге келгеннен кейін тігін ісіне қызығушылық танытып, біртіндеп кәсіби дағдыларын қалыптастырған.
— Дайын киімдердің түймелерін қадаймын, кейде тігін тігемін. Бұл жұмысты осында келіп үйрендім. Тігін тігу кезінде ойың бөлініп, жұмысқа көңіл қоясың. Ер азамат болсам да, бұл кәсіпті меңгеру маған қиын болған жоқ. Қазір тігін ісіне қызығушылығым артып келеді. Мен абайсызда жол-көлік оқиғасын жасап, сотты болдым. Кінәмді мойындаймын, жазамды өтеп жатырмын. Отбасым бар. Жұмыстан алатын жалақымды отбасыма жіберіп тұрамын. Бостандыққа шыққан соң да тігін ісін жалғастырғым келеді. Сондықтан қазірден бастап бұл кәсіпті жақсы меңгеруге тырысып жүрмін, – дейді жазасын өтеуші.
ҚАЖ мекемелерінде жазасын өтеушілерді еңбекпен қамту – олардың түзелуіне және қоғамға қайта бейімделуіне бағытталған маңызды жұмыстардың бірі. Еңбек ету арқылы олар жауапкершілік пен тәртіпке үйреніп, кәсіби дағдыларын қалыптастырады. Бүгінде жазасын өтеушілер өндіріс орындары мен тігін цехтарында еңбек етіп, өздеріне қажетті кәсіптерді меңгеруде. Мекемеде алған кәсіби дағдылар олардың бостандыққа шыққаннан кейін жұмысқа орналасып, қоғамға бейімделуіне мүмкіндік береді.
