Сыр өңіріндегі Қоғамдық даму басқармасына қарасты «Қоғамдық келісім және тіл орталығы» КММ ұйытқы болуымен, «Мың бала» мәдени-ағартушылық жобасы шеңберінде Достық үйінде мемлекеттік қызметшілер мен этнос өкілдерінің қатысуымен «Мәміле» клубының тұсауы кесіліп, арты тартысты «Қызық екен…» интеллектуалдық сайысына ұласты.
Салтанатты жиынды «Қоғамдық келісім және тіл орталығы» КММ директоры Бақытжан Камалов ашып, мемлекеттік тілдің қоғамдық келісім мен ел бірлігін нығайтудағы айрықша орнына тоқталып, онкүндік аясындағы жоспарлармен бөлісіп, қатысушыларға ізгі лебізін білдірді.
Сонымен бірге, «Сыр медиа» ЖШС директорының орынбасары Азиз Батырбеков сөз алып, жиналғандарды мерейлі мерекемен құттықтап, тіл саясатын насихаттаудағы бұл бастаманың маңыздылығын атап өтті.
Жиын барысында таныстырылған «Мәміле» клубы тренингтер, топтық сайыстар, жазба жұмыстары, шешендік өнер, көпшілік алдында сөйлеу мәдениеті және ағылшын тілдік алаңы сияқты бірнеше негізгі бағытта жұмыс жүргізеді. Жобаның басты мақсаты – жұмыс барысын заманауи үлгіде үйлестіру арқылы тіл үйренушілерге қолайлы орта қалыптастыру болса, басты міндеті – өзін тұлға ретінде дамытуға ұмтылған әрбір азаматқа сауаттылық дағдыларын шыңдап, көшбасшылық қасиеттерін дамытуға жол ашу.
Іс-шараның екінші бөлігінде өткен «Қызық екен…» интеллектуалдық сайысында қатысушылар тіл білімі мен танымдық бағыттағы күрделі сұрақтарға тапқырлықпен жауап беріп, өзара білім жарыстырды.
Әртүрлі сала мамандары мен этнос өкілдерінен құралған топтар жоғары ұйымшылдық пен сөз саптау мәдениетін көрсетіп, мемлекеттік тілді меңгеру деңгейлерін байқатты.
Өте тартысты өткен бәйгеде танымдық өресімен дараланған «Білгіштер» тобы оқ бойы озып шығып, Қоғамдық даму басқармасының маманы Нұржан Жарылқасын мен Ассамблея жастарының белсендісі Роман Хегай І дәрежелі дипломмен марапатталды.
Ал өзбек этносының белсенді өкілі Дильшат Ибрагимов және облыстық экономика және қаржы басқармасының бөлім басшысы Шынар Әбиева «Тапқырлар» тобының сайыскерлері Алғыс хаттарға ие болып, белсенді қатысушыларға ұйымдастырушылар тарапынан бағалы сыйлықтар табысталды.
