Төретам кентіндегі теміржол вокзалы – елді мекеннің тарихымен біте қайнасқан, тұрғындар мен жолаушылар үшін маңызы зор нысандардың бірі. Нақты кезеңде сонау 1965 жылы салынған вокзал ғимаратында күрделі жөндеу, жаңарту және абаттандыру жұмыстары жүргізілуде.
Ғимараттың жалпы аумағы 597,6 шаршы метрді құрайды. Жаңғырту барысында нысанның ішкі және сыртқы бөліктеріне қажетті жұмыстар жүргізілуде. Бүгінде негізгі жұмыстар 100 пайыз аяқталуға жақын. Электр жүйесін жаңарту жұмыстарының 95 пайызы, ал жалпы құрылыс жұмыстарының 96 пайызы орындалған. Жөндеу барысында ғимараттың сыртқы келбетін жаңарту, ішкі бөлмелерін ретке келтіру, инженерлік желілерін жаңғырту секілді жұмыстарға басымдық берілген. Мұндағы мақсат – вокзал ғимаратын заман талабына сай келтіріп, жолаушыларға қолайлы жағдай жасау.
Вокзал – тек пойыз күтіп алатын немесе шығарып салатын орын ғана емес. Ол Төретам мен жұлдызды қалашық Байқоңырға ат басын тіреген қонақтардың елді мекен туралы алғашқы әсерін қалыптастыратын нысанның бірі. Сондықтан оның сәулеттік келбеті, тазалығы мен айналасының абаттандырылуы елді мекеннің жалпы көркімен тікелей байланысты. Осыған орай қазір вокзал аумағын абаттандыру жұмыстары да жүргізілуде. Ғимаратпен қатар оның айналасының көркейтілуі нысанның жалпы келбетін жақсартып, тұрғындар мен жолаушылар үшін жайлы орта қалыптастыруға мүмкіндік береді.
Төретам вокзалының тарихы өткен ғасырдың ортасынан бастау алады. Алты белесті аттап өтіп, талай жолаушыны қарсы алып, талай адамды сапарға шығарып салған ғимарат бүгінде жаңа кезеңге қадам басып отыр. Жөндеу жұмыстарының сапалы жүргізілуі – басты талап. Себебі жаңғыртылған вокзал ұзақ жылдар бойы тұрғындар мен жолаушыларға қызмет ететін әлеуметтік маңызы бар нысан болуы тиіс.
Төретамның тыныс-тіршілігімен тығыз байланысты вокзалдың жаңаруы – елді мекен инфрақұрылымының жақсарып, тұрғындарға көрсетілетін қызмет сапасының артуына бағытталған игі істің бірі. Жұмыстар толық аяқталып, аумағы абаттандырылғаннан кейін вокзал кенттің жаңарған келбетіне өзіндік үлес қосатын заманауи нысанға айналмақ.
Ләззат СЕРІКБАЙҚЫЗЫ.
