Токиодағы сайлау учаскесінде алғашқылардың бірі болып Қазақстан азаматы Әлішер Әзімбаев дауыс берді. Ол сайлауға қазақ қоғамындағы әділдік, заңдылық пен даналықтың символы саналатын би бейнесінде келді, деп хабарлайды Kazinform ҚР СІМ-не сілтеме жасап.
Әлішер Әзімбаев Цукуба университетінде «Мемлекеттік саясат» мамандығы бойынша білім алып жатыр. Ол өзінің бейнесі арқылы қазақ халқының тарихи дәстүрлері мен Қазақстанның жас ұрпағының заманауи ұмтылыстары арасындағы байланысты көрсеткісі келген.
Әлішердің айтуынша, Құрылтай тарих бойы ел тағдырын айқындайтын маңызды шешімдер қабылданған ұлттық жиын болған.
— Менің ойымша, жаңадан құрылған Құрылтай бұл дәстүрді заманауи саяси институт ретінде жалғастырады. Ол халықпен өзара іс-қимыл жасай отырып, мемлекеттік маңызы бар мәселелерді шешуге бағытталған, — деді ол.
Токиодағы №425 сайлау учаскесі жергілікті уақыт бойынша сағат 07:00-де ашылды. Жапонияда жүрген қазақстандықтар шетелдегі азаматтардың арасында Құрылтай депутаттарын сайлауға алғашқылардың бірі болып дауыс беру мүмкіндігіне ие болды.
