Қызылорда қалалық прокуратурасы мен қала әкімдігінің қызметкерлері бірлесіп, «Қауіпсіз қала» іс-шарасы аясында алкоголь өнімдерінен бас тартқан елді мекендер жобасы бойынша профилактикалық-түсіндіру жұмыстарын жүргізді.
Іс-шара барысында Қызылөзек және Ақжарма ауылдық округтерінің тұрғындарымен кездесулер өткізіліп, елді мекендердегі бірқатар сауда орындары араланды.
Кездесулер барысында тұрғындарға алкоголь өнімдерін тұтынудың алдын алу, қоғамдық қауіпсіздікті қамтамасыз ету, құқық бұзушылықтардың алдын алу және салауатты өмір салтын қалыптастыру бағытында түсіндіру жұмыстары жүргізілді.
Қазіргі уақытта Қызылөзек және Талдыарал елді мекендері алкоголь өнімдерінен бас тартқан елді мекендер тізіміне енгізілген. Осыған байланысты аталған елді мекендердегі дүкен сөрелерінде алкоголь өнімдері сатылмайды.
Аталған бастаманың оң нәтижесі Талдыарал елді мекенінде де байқалады. Атап айтқанда, өткен жылдың есепті кезеңімен салыстырғанда биылғы ауыл аумағында бірде-бір қылмыс тіркелмеген.
Бұл көрсеткіш тұрғындардың қоғамдық қауіпсіздікке деген жауапкершілігінің артып, құқық бұзушылықтардың алдын алуға бағытталған бірлескен жұмыстың нәтижелі екенін көрсетеді.
«Алкоголь өнімдерінен бас тартқан елді мекен» жобасының негізгі мақсаты – тұрғындардың қауіпсіздігін қамтамасыз ету, құқық бұзушылықтардың алдын алу және халық арасында салауатты өмір салтын қалыптастыру.
Осы бағыттағы профилактикалық және түсіндіру жұмыстары алдағы уақытта да жүйелі түрде жалғасын табатын болады.
