Осыған дейін жарияланған Түркістан қаласында ауыр атлетикадан жеке жаттығулар бойынша 20 жасқа дейінгі юниор ұлдар мен юниор қыздар арасындағы Қазақстан Республикасының жеке-командалық чемпионаты 9 шілдеде өз мәресіне жетті.
Еліміздің 13 облысынан қатысқан додалы сайыста Қызылорда облысы жалпыкомандалық нәтиже бойынша Қазақстан чемпионы жоғары атағына ие болды. Екінші орын Алматы қаласына, ал үшінші орын Түркістан облысына бұйырды.
Жарыстың соңғы екі күнінде ауыр салмақтағы атлеттеріміз өнерлерін көрсетіп, жақсы нәтижелерге қол жеткізді.
88 келі Сәулебеков Ерасыл — І орын (жұлқа 146 келі және серпе 181 келі, қоссайыста 327 келі.);
88 келі Пернебек Қайсар — ІІІ орын (жұлқа 130 келі және серпе 156 келі, қоссайыста 286 келі.);
94 келі Нұрғали Әділет — ІІІ орын (жұлқа 132 келі және серпе 157 келі, қоссайыста 289 келі.).
Осы тұрғыда халықаралық аренадан тағы бір жақсы жаңалық келіп жетті. Колумбияның Кали қаласында шілденің 5-11 аралығында жасөспірімдер арасында Әлем чемпионаты өтуде. Аталған жарыста жерлесіміз Мырзахмет Ернұр 79 келі салмақ дәрежесінде жұлқа 142 келі және серпе 162 келі, қоссайыста 289 келі көтеріп, қола медаль жеңіп алды.
Мырзахмет Ернұрдың бапкерлері: Алдабергенов Жеңіс, Алдабергенов Айбол және Қайратов Мұрат.
Жеңісті күндеріміз көп болсын!
