9 шілде – Су шаруашылығы қызметкерлерінің күні. Адамзат пен табиғат тіршілігіне нәр беретін суды реттейтін өз мамандары бар. Атаулы мереке біздің елде 2019 жылдан бастап күнтізбеге еніп, аталынып өтіп келеді. Иә, су – елдің ырысы мен берекесінің бастауы, тіршіліктің өзегі.
Арал ауданы Аралқұм ауылының тұрғыны Қосай Жұмамұратов соңғы 35 жылдан бері «Арал-Сарыбұлақ» топтық су құбырының Аралқұмдағы бөлімшесінде машинист-оператор болып табан аудармай еңбек етіп келеді. Бір қызығы, ол өткен жылы мемлекеттік марапат алады. Алайда «мен омырауға орден тақтым, ІІІ дәрежелі «Еңбек даңқы» орденін Мемлекет басшысының өз қолынан алдым» деп былайғы жұртқа айтпаған. Әріптесімнен жағымды хабарды білген соң дереу Қосай ағамызға қоңырау шалдым. Інілік ізетпен сәлем берген бойда байқағанымыз қазаққа тән қарапайымдылықтың иісі тұтқаның арғы жағынан аңқып тұрды. Ағалық ізет танытып, ә дегеннен ескі танысындай әңгімесін айта кетті.
Ағамыз 1965 жылы 16 қазанда Аралқұм ауылында дүниеге келген. 1982 жылы ауылдағы №61 орта мектепті бітірген соң еңбекке араласқан. Мектеп қабырғасында оқып жүріп алған механизатор, тракторшы мамандықтары осы кезде кәдеге асыпты. Ал 1983 жылы ҚТЖ-ға қызметке орналасып, бағыттаушы мамандығы бойынша еңбек еткен. Қосай ағамыз 1989 жылға дейін шойынжолдың жұмысымен шыңдалып, 1990 жылы Аралдағы құрылыс мекемесіне ауысады. Сол мекемеде екі жыл жұмыс істеп, қазіргі өзі еңбек етіп, абыройға кенеліп отырған Аралқұмдағы су мекемесінің құрылысын салды. Ағамыз 1990 жылдардың бас кезінен бері «Арал-Сарыбұлақ» топтық су құбырының Аралқұмдағы бөлімшесінде жұмыс жасап келеді. Ұзақ жылғы еңбегі елеусіз қалмай бірнеше рет мекеме, аудан, облыс басшылығы тарапынан сый-құрметке ие болыпты. Осының өзі біз айтқан қызметіне адалдықтың айқын көрінісі еді.
Қосай ағамыздың өміріндегі ең маңызды жаңалық былтыр 9 шілде – Су шаруашылығы қызметкерлері күні қарсаңында орын алды. Осы салтанатты сәтті Қосай Ерекешұлы былай еске алды.
– Кәсіби мерекеге сай марапат берілетін болды. Өзіміздің «Арал-Сарыбұлақ» топтық су құбыры мекемесінің басшысы Ислам Қапаров пен Аралқұм су айдау мекемесінің аға шебері Темірхан Ахметовтың ұсынысымен және өзге де әріптестердің қолдауымен ұсыныс берілген екен. Ол қолдау тауыпты. Алғашында Су және Ирригация минситрінің қолынан марапат аласың деді. Соған дайындалып жүргенімде кадр бөлімінен қоңырау шалып: «Сіз 8 шілде күні Астанада болуыңыз керек» деген хабар келді. Асығыс жолға шығып, уақытында елордада болдым. 9 шілдеде Президент Қасым-Жомарт Тоқаевтың қолынан еліміздің жоғарғы марапатының бірі ІІІ дәрежелі «Еңбек даңқы» орденін алғанымда төбем көкке жеткендей болды. Бұл орден сала жұмыскерлеріне еңбектегі жоғары жетістігі үшін беріледі, – дейді кейіпкеріміз.
Біз мұны жоғарыда айтып өткен көпжылғы еңбектің өтеуі, халық құрметі деп білеміз. «Еңбегіне қарай құрмет, жасына қарай ізет» дейді, халқымыз.
Әңгімелесе отырып кейіпкеріміздің тағы қырына қанықтық. Әкесі Ерекеш 1920 жылы туған, Отан соғысының ардагері. Сол алапат соғыста бір аяғынан айырылған. «Әкем жалғыз аяғымен жүріп-ақ атқа, оны баптап бәйгеге қосуға қатты қызықты. Кешегі кеңестік кезеңде малшылар слеті өтіп тұратын. Соған қатысып жүрдік, мен баламын, атқа шауып, талай бәйгеден жүлделі орындар алдық. 1986 жылы Жәмиламен отау құрдым. Ал әкем 1987 жылы өмірден озды. Содан кейін бұл кәсіптен аз уақыт қол үзіп, 2000 жылдардың басында атадан келе жатқан осы бір істі қайта қолға алдық» дейді ағамыз. Ұлы Әлимұса да 7-8 жасында атқа шауып, шабандоз бала атаныпты. Түрлі деңгейдегі бәйгелерге қатысып, жүлдегер қатарынан көрінген. Атсейіс ағамыздың құнаны былтыр Ақтөбе облысы, Шалқар ауданы, Бозой ауылында құнан жарыста жүлделі І орын иеленіпті.
Ағамыздың жары Жәмила кәсіппен айналысса, ұлы Әлимұса әке жолын жалғап теміржол саласында еңбек етеді. Бүгінде зайыбы Жәмила екеуі немерелерінің ортасында отыр. Өкініштісі, ағамыздың қызы дүниеден ерте озыпты. Осылай қызығы мен қиындығы қатар жүрген өмір өзен сияқты ағып, Жәмила жеңгей екеуі үлкендік жасқа еніп, қазыналы шақтарына жетті. Ынтымағы жарасқан отбасы иелеріне алдағы уақытта жақсы денсаулықта болып, балаларының рахатын көріп, қызығы мен қуанышына бөлене беріңіздер демекпін.
Оңталап ЖОЛДАСОВ,
Қазақстан Журналистер одағының мүшесі.
Арал ауданы.
