Жапониядан Бельгияға бара жатқан жолда Алматыда жексенбіні тамаша өткіздім. Демалыс күні өзен жағасында серуендегеннен кейін адам ерекше қуаттанып, жақсы көңіл күйге бөленеді.
Осындай сәтте өзіме де, айналамдағы адамдарға да неге дәл осы елде, дәл осы күрделі кезеңде өмір сүріп жатқанымыздың үлкен бақ екенін тағы бір еске салғым келеді.
1. Қазақстан – жас мемлекет. Мұнда адамдар әлі де салыстырмалы түрде ерте отбасын құрады, жанұялар үлкен, балалар көп. Ал көпбалалы отбасы – мақтануға тұрарлық нәрсе. Мұндай көріністі бүгінде ең бай мемлекеттерде де, біздің деңгейлес елдерде де сирек кездестіресің. Бұл – өте маңызды артықшылық. Өйткені бізде күш-қуат мол, өзгеріс жасауға, бизнес құруға, еңбек етуге, жаңа мамандықтар мен технологияларды игеруге деген құлшыныс жоғары. Бұл – шын мәнінде баға жетпес капитал. Мұны анық түсіну үшін әлемді көп аралау керек.
2. Қазақстан – ауқатты ел. Сатып алу қабілетінің паритеті (PPP) бойынша жан басына шаққандағы жалпы ішкі өнім көлемі жөнінен біз қазірдің өзінде Түркиядан, Грекиядан және Қытайдан озықпыз. 2025 жылы жалпы ішкі өнім көлемі бойынша алғаш рет Ресейден де алға шықтық. Сонымен қатар экономикамыз «орташа табысты» елдердің басым бөлігінен әлдеқайда жоғары қарқынмен өсіп келеді – шамамен 5-6%, ал әлемдік орташа өсім 2-3% шамасында. Бұл біздің және балаларымыздың заманауи технологияларға, білімге және халықаралық серіктестіктерге әлемнің көптеген елдеріне қарағанда жылдамырақ қол жеткізуіне мүмкіндік береді. Өз елімде жоғары білімге және жасанды интеллект мүмкіндіктеріне деген сұраныстың тұрақты түрде жоғары екенін көріп жүрмін. Мемлекет те тәуелсіздік алғаннан бергі ең жоғары деңгейде білім беру саласына қаржы бөліп жатыр. Адами капитал шынымен өсіп келеді. Әрбір келесі ұрпақ құндылықты бұрынғыдан да тиімді жасай алады, демек, еліміз де әрі қарай байи береді.
3. Біз – технологияға сенетін әрі кәсіпкерлік рухы мықты ұлтпыз. Біз жауапкершіліктен де, тәуекелден де қорықпаймыз. Біз көп нәрсенің мүмкін екенін түсінеміз және азымен шектелуге келісе бермейміз. Сонымен бірге біз – тың жолда кездесетін барлық қиындықты еңсере алатын күрескер халықпыз. Адамдарға сындарлы еркіндік, әділ ойын ережелері және үлкен іс жасап, соның нәтижесінде лайықты табыс табуға мүмкіндік берілсе, олар ешқандай Хогвартссыз-ақ ғажайыптар жасай алады. Соңғы бірнеше жылда Қазақстанда қалыптасқан мықты технологиялық кәсіпкерлердің шоғырындай құбылысты мен басқа ешбір елден көрген емеспін. Бұл – елдегі қалыптасқан ортаның, жоғары деңгейдегі басымдықтардың және кең даламыздың ауасымен бірге келген мәдениеттің жемісі деп ойлаймын. Және бұл қасиет бізде әрқашан болған.
Тимур Турлов
