Америкалық сарапшылар Орталық Азия мен Оңтүстік Кавказ елдеріндегі ақпараттық ахуалға алаңдаушылық білдірді.
АҚШ-тың The Washington Post басылымы «Путиннің келесі бағыты» атты мақаласында Ресейге көршілес елдерде ақпараттық ықпал байқалып отырғанын жазады.
АҚШ Президенті Рональд Рейган әкімшілігі тұсында Әскери-теңіз күштері министрінің орынбасары болған, бүгінде Йорктаун институтының президенті Сет Кропси мен осы ғылым ордасының аға ғылыми қызметкері, «Тұран» зерттеу орталығының директоры Джозеф Эпштейн әлгіндей өз байламдарын ортаға салды.
«Орталық Азия мен Оңтүстік Кавказда ахуалдың күрделену қаупі қайта байқала бастады. Бұл елдердегі Ресейдің ықпалы енді танктермен емес, ақпараттық және дезинформациялық әдістермен жүзеге асуда», – деп жазады The Washington Post.
Авторлар Қазақстанның геосаяси жағдайына да тоқталып, оның Ресеймен әлемдегі ең ұзын құрлықтық шекараға ие ел екенін еске салады.
Сет Кропси мен Джозеф Эпштейннің пайымдауынша, қазіргі Ресейдің әскери ресурсы шектеулі болғандықтан, кең ауқымды әскери әрекеттерге баруы екіталай. Дегенмен, ол өз мүддесін ақпараттық ілгерілетуге талпынуы мүмкін.
