«Ел боламын десең, бесігіңді түзе» деген ұлағатты сөздің мәні ешқашан жойылған емес. Мемлекеттің ертеңі – бүгінгі ұрпақтың қолында. Ал сол ұрпақтың білімді, саналы, отаншыл болып қалыптасуына ықпал ететін темірқазық – Қазақстан Республикасының Конституциясы.
Қазақстанның жаңартылған Конституциясы – еліміздің демократиялық даму бағытын айқындаған маңызды құжат. Оның басты мақсаты – адам құқықтары мен бостандықтарын қорғау, заң үстемдігін нығайту және әрбір азаматқа тең мүмкіндік беру. Осы құндылықтардың ішінде білім беру саласы ерекше орын алады. Өйткені, білімді ұлт – мемлекеттің ең үлкен байлығы әрі тұрақты дамуының басты кепілі.
Ұстаз ретінде менің басты мұратым – білім алушыларға білім беріп қана қоймай, олардың бойына адамгершілік қасиеттерді, елжандылықты, әділдікті және заңға деген құрмет сезімін қалыптастыру. Себебі ертең ел тағдырын сеніп тапсыратын азамат бүгін жоғары оқу орнының қабырғасында білім алуда. Қазіргі таңда білім беру жүйесі қарқынды жаңарып келеді. Жаңаша оқыту әдістері, цифрлық технологиялар, білім алушылардың шығармашылығын дамытуға бағытталған бағдарламалар – мұның бәрі сапалы білімге жол ашады. Бірақ қандай өзгеріс болмасын, оның негізінде адам құқығын құрметтеу, заңға бағыну және әділдік қағидаттары жатуы тиіс. Бұл – Конституцияның басты мұраты.
Жоғары оқу орыны — тек білім беретін орын емес, ол азамат тәрбиелейтін қасиетті шаңырақ. Дәріс барысында да, тәрбиелік шара барысында да біз білім алушыларға Конституцияның маңызын түсіндіріп, олардың құқықтық мәдениетін қалыптастыруға ерекше мән беруіміз керек. Өз құқығын білетін әрі өзгенің құқығын құрметтейтін ұрпақ қана өркениетті қоғамның тірегі бола алады.
Бүгінгі әлем білім мен ғылымға сүйеніп дамып келеді. Осындай кезеңде бәсекеге қабілетті ел болудың бірден-бір жолы – сапалы білім беру. Ал сапалы білімнің негізі – заңмен қорғалған мүмкіндік, әділ қоғам және тұрақтылық дер едім. Сондықтан Конституцияда бекітілген қағидалар білім саласының дамуына да қуатты серпін береді де ойлаймын. Ұстаз үшін ең үлкен марапат – студенттің биіктен көрінуі. Біз тәрбиелеп, білім беріп отырған жас буын Конституцияны құрметтеп өссе, еліміздің болашағы да нық болмақ. Білім мен құқық – бір арнаның қос саласы. Бірі адамның ой-өрісін кеңейтсе, екіншісі оның азаматтық ұстанымын қалыптастырады. Сондықтан Конституция қағидаларын жас ұрпақтың санасына сіңіру – әрбір ұстаздың қасиетті міндеті болуы керек.
ҚР Президенті Қасым-Жомарт Тоқаев айтқандай, «Әділетті Қазақстанды құру» – бәрімізге ортақ іс. Бұл жол білімді, заңды құрметтейтін, ел тағдырына бейжай қарамайтын ұрпақ тәрбиелеуден басталады. Себебі Конституцияға сүйенген білімді ұрпақ – мемлекетіміздің ең сенімді тірегі, ал білім мен заң үстемдігі қатар орныққан қоғамның болашағы әрдайым жарқын болатыны сөзсіз. Сондықтан Ата заңымыздың абыройы әрдайым биік болып, тәуелсіз Қазақстанның өсіп-өркендеуіне, халықтың әл-ауқатының артуы мен келер ұрпақтың жарқын болашағына қызмет ерте берсін!
Ш.Ж.Қанқожаева,
Қызылорда «Болашақ» университетінің аға оқытушысы
