Өмірде артында өшпес із қалдырып, еңбегімен елдің құрметіне бөленген азаматтар болады. Сондай жандардың бірі – Әбілда Смағұлұлы.
Мен, Жұбатырұлы Қасым, Әбілда ағамызды 1959 жылдан бері жақсы білемін. Сол жылдары мектеп оқушылары егіс басына барып, отақ отау, кесек құю, масақ теру сияқты жұмыстарға қатысатынбыз. Әбілда ағамыздың еңбекке деген ерекше жауапкершілігін, қарапайымдылығы мен адамгершілігін сол кезеңдерде көріп өстік.
Ол өмір бойы адал еңбек етіп, күрішші болып еңбек жолын бастап, кейін сары алтыннан тау тұрғызған бригадир болды. Ерен еңбегі мемлекет тарапынан жоғары бағаланды. 1946 жылы кеңес одағының маршалы Рокоссовскийдің арнайы Алғыс хатымен марапатталды. Сонымен қатар, ВДНХ-ның алтын медалінің иегері атанып, Еңбек Қызыл Ту және Ленин ордендерін кеудесіне тақты. Бұл – маңдай термен келген абырой мен ел сенімінің айқын көрінісі.
Ұлы ойшыл Жүсіп Баласағұн: «Адам бойында жақсы қасиет болмаса, оған бақ та, бақыт та қонбайды» деген екен. Осы сөз Әбілда ағамыздың болмысына дәл келеді. Оның еңбекқорлығы, қарапайымдылығы, сабырлылығы мен адамға деген жанашырлығы айналасына әрдайым үлгі болды. Ол адамдарды жақсылыққа, төзімділікке, шыдамдылыққа тәрбиелеп, өнегелі сөзін айтудан жалықпайтын.
Адамның ғұмыры өткінші болғанымен, артында қалған өнегелі өмірі ешқашан ұмытылмайды. Уақыт өткен сайын мұндай азаматтардың бейнесі көмескіленбей, қайта алтындай жарқырай түседі. Олар – ел тарихының тірі шежіресі, ұрпаққа үлгі болатын рухани мұра, адал еңбектің темірқазығы.
Әбілда ағамыз туралы айтылар естелік аз емес. Егер олар түгел қағазға түсірілсе, бірнеше том кітапқа жүк болар еді. Мен өзімнің жүрегімде сақталған аз ғана естелігімді оқырманмен бөлісіп отырмын.
Бүгінде Әбілда ағамыздың жалғыз ұлы Қанжарбек Алматы қаласында тұрып, кәсіппен айналысады. Қыздары өз алдына шаңырақ көтеріп, өсіп-өнген әулетке айналды. Қанжарбек ініміз әке-шешесінің рухына тағзым етіп, үлкен ас беріп, спорттық жарыстар ұйымдастырып, аудан жұртшылығымен бірге Құран бағыштауды жоспарлап отыр екен, қабыл болсын! Бұл – ата-ана аманатына деген құрметтің жарқын үлгісі.
Мен бүгінге дейін Әбілда ағамыздың айтқан ақыл-кеңестерін ұмытқан емеспін. Жатқан жері жайлы, топырағы торқа болсын! Ал Қанжар інімізге амандық, бақ-береке, кәсібіне табыс, ел-жұртының арасында абырой мен бедел тілеймін.
Қасым Жұбатырұлы
