Ұстаз – ұлы ұғым. Адам баласының жүрегінде қадір тұтып, құрметтейтін екі ұғым болса, соның бірі – ұстаз. Ұстаздың еңбегі – өлшеусіз, баға жетпес құндылық. Өйткені, ұстаз еңбегінің арқасында ғана әкім де, қара да, ғалым да, дарын да, бәрі-бәрі өз биіктеріне көтеріле алады. Шәкірт ұстаз салған сара жолмен жүріп, ол нұсқаған сүрлеумен ғана ілгері басады, сөйтіп өмірден, қоғамнан өз орнын табады. «Ұстазы жақсының ұстамы жақсы» демекші, үлкен өмірге жол сілтеген жандарға құрмет қашан да жоғары болатыны анық.
Сондай ұстаздардың бірі – Нұрмаханова Гүлжанат Абдуллақызы. Ол Қызылорда облысы, Қармақшы ауданы, Иіркөл ауылындағы №106 орта мектептің бастауыш сынып мұғалімі, педагог-зерттеуші. Ұстаздық жолында 35 жыл бойы жас ұрпаққа сапалы білім мен саналы тәрбие беріп, шәкірт жүрегінен орын алған білікті маман.
Еңбек жолында өзінің кәсіби шеберлігімен, ізденімпаздығымен және шығармашылық көзқарасымен ерекшеленіп келеді. Оның шәкірттері республикалық, облыстық білім бәйгелері мен пәндік сайыстарда жоғары нәтижелер көрсетіп, жүлделі орындарды иеленуде. Әсіресе, республикалық «Зерде» ғылыми жобалар байқауында оқушылары бірнеше мәрте республика деңгейінде жүлдегер атанып, ұстаз еңбегінің жемісті екенін дәлелдеді.
Білім беру саласындағы көп жылғы адал еңбегі мен жоғары жетістіктері үшін Гүлжанат Нұрмаханова Қазақстан Республикасы Оқу-ағарту министрлігінің Құрмет грамоталарымен және Алғыс хаттарымен марапатталған.
Ұстаздың табанды еңбегінің тағы бір жарқын көрінісі – 2025-2026 оқу жылындағы түлектерінің жетістігі. Оның шәкірттері Ібірагімова Айкенже Қайратқызы, Бижанова Жібек Алматқызы және Асанова Жансая Әуезханқызы мектеп бітіруде ең жоғары көрсеткішке қол жеткізіп, «Алтын белгі» иегері атанды.
Гүлжанат Абдуллақызы – білім мен тәрбиені ұштастыра білген, шәкірттерінің болашағына бағыт-бағдар беріп, олардың өмірден өз орнын табуына жол ашқан тәжірибелі де тағылымды ұстаз. Оның еселі еңбегі мен кәсіби біліктілігі әріптестері мен ата-аналардың құрметіне бөленіп, шәкірттерінің жетістіктерінен көрініс тауып келеді. Ұстаздың өнегелі жолы — кейінгі буын педагогтарына үлгі, ал тәрбиелеген шәкірттері – оның ең үлкен мақтанышы.
