Жақын уақытта партия ұйымдық құрылымын одан әрі қалыптастырып, өңірлердегі жұмысын бастайды.
Қазақстан Республикасы Әділет министрлігі 1 маусым күні жаңа «Әділет» саяси партиясын ресми түрде тіркеді.
Партияның мәліметінше, оның құрамына түрлі кәсіби салалардың өкілдері кіреді: еңбек адамдары, мұнай сервистік және тау-кен металлургиясы саласының қызметкерлері, шахтерлер, спорт, білім беру, денсаулық сақтау, ғылым, кәсіпкерлік, IT-сектор, заң саласы және креативті индустрия өкілдері.
«Партия бағдарламасының негізінде әділдік, жауапкершілік, тең құқықтылық, патриотизм және прогресс қағидаттары жатыр. Негізгі басымдықтардың қатарында заңдылық пен құқықтық тәртіп қағидаттарын нығайту, тиімді институттарды дамыту, өңірлерді қолдау, цифрландыру, адами капиталды дамыту және бәсекеге қабілетті экономиканы қалыптастыру бар», – деп хабарлады партияның баспасөз қызметі.
Алдағы уақытта партия ұйымдық құрылымын одан әрі қалыптастырып, өңірлерде жұмысын жүргізуге кіріседі.
15 сәуірде бастамашыл топ жаңа партия құру ниеті туралы ресми мәлімдеме жасаған болатын. Ал 16 сәуірде Әділет министрлігі тиісті хабарламаның қабылданғанын растады. Партияны Айбек Дәдебай басқарады. 30 сәуірде цифрлық платформа іске қосылғаннан бері қазақстандықтар партия қатарына кіру үшін 9000-нан астам өтініш берген.
