Ел аманаты артылған жауапты жолды таңдап, сенімді ақтауды мұрат еткен қызметкерлердің қатары бүгін бір буынмен толықты. Қылмыстық атқару жүйесі (ҚАЖ) департаментіне қарасты №68 мекемесінде жас қызметкерлердің ант қабылдау рәсімі өтті. Салтанатты шараға мекеме басшылығы мен жеке құрам, сондай-ақ, сала ардагерлері Талғат Ахметов, Талғат Қамзаев және Данияр Күдебаев қатысып, мерейлі мезетке куә болды.
Міне, жас қызметкерлер сапқа қосылып, міндетті абыроймен атқаруға бел буып отыр. Ант беру рәсімінде олар елге қалтқысыз қызмет етуге, қоғамдық тәртіп пен заң талаптарын қатаң сақтауға дайын екенін білдірді. Бұл ретте ардагерлер де төзім мен табандылықтың саладағы басты қағида екенін қаперге салды.
– Екі сөйлеудің ерге сын екенін жас күнімнен санаға сіңіріп өстім. Сондықтан анттағы әр сөздің түп-төркінін терең түсінемін. Қызметке қабылданғаныма қуаныштымын, бойымда ерекше толқу барын да жасырмаймын. Өйткені, арман-мақсатыма біртабан жақындағандай болдым. Енді ауыр да абыройлы жолда міндетімді мүлтіксіз атқаруға ниеттімін, – дейді Режим және күзет бөлімінің бақылаушысы Алмазбек Бегайдарұлы.
Замира Қонысжан.
