Қорқыт ата атындағы Қызылорда университетіндегі ботаникалық бақ және жылыжай шаруашылығында Қызылорда облысының әкімі Мұрат Ергешбаевтың қатысуымен «Таза Қазақстан» республикалық акциясы өтті.
Экологиялық акцияға облыс әкімінің орынбасары Мейрамбек Шермағанбет, университеттің Басқарма төрағасы – Ректор Наурызбай Байқадамов, Ғылыми жұмыстар және халықаралық байланыстар жөніндегі проректоры Майнура Бурибаева, Әлеуметтік және тәрбие жұмыстары жөніндегі проректоры Уалихан Ибраев және университеттің профессор-оқытушылары мен студенттері қатысты.
Сонымен қатар, «Сыр волонтерлары» ұйымы, облыстық орман шаруашылығының мамандары белсенді атсалысты.
Экологиялық шара аясында қатысушылар алдымен арнайы ұйымдастырылған көрмені тамашалап, студенттердің ғылыми жобаларымен танысты. Сондай-ақ ботаникалық бақ аумағына 200-ден астам көшет отырғызылды.
Айта кетейік, ботаникалық бақта бүгінде 1500-ден астам түрлі ағаш түрі өсірілуде. Ал жылыжай шаруашылығы жыл бойы өнім беріп келеді. Мұнда банан, лимон секілді шет елден әкелінген дақылдардың өңір климатына бейімделуі мен өнім беру мүмкіндіктері зерттелуде.
Республикалық экологиялық акцияға жалпы саны 500-ге жуық адам қатысты.
