Аралда тұрғындар көп шоғырланатын аумақтар ретке келтірілді
«Таза Қазақстан» республикалық экологиялық акциясы аясында аудан аумағында ауқымды сенбілік ұйымдастырылып, санитарлық-тазалық және абаттандыру жұмыстары жүргізілді.
Сенбілік барысында Арал ауданының орталығы мен ауылдық округтердегі көшелер, қоғамдық орындар және әлеуметтік нысандардың айналасы тазартылып, бей-берекет тасталған қоқыс қалдықтары шығарылды. Сонымен қатар саябақтар, аллеялар мен тұрғындар көп шоғырланатын аумақтар ретке келтірілді.
Көркейту жұмыстары аясында жол жиектері, ағаш түптері мен қоршаулар әктеліп, аялдамалар мен қоғамдық орындарға сырлау жұмыстары жүргізілді. Бұл шаралар ауданның эстетикалық келбетін жақсартып, тазалық мәдениетін қалыптастыруға бағытталды.
Экологиялық акцияға мемлекеттік мекеме қызметкерлері, жастар, еріктілер және аудан тұрғындары белсенді қатысып, туған өлкенің тазалығына жанашырлық танытты. Ортақ іске жұмылған тұрғындар қоршаған ортаны таза ұстау әр азаматтың жауапкершілігі екенін іс жүзінде көрсетті.
Қазалыда Рәміздер алаңына санитарлық тазалық жұмыстары жүргізілді
Қазалы ауданы аумағында «Таза Қазақстан» экологиялық бағдарламасы аясында ауқымды санитарлық тазалық жұмыстары ұйымдастырылды.
Сенбілік жұмыстары аудан орталығы мен аудан көлеміндегі барлық елді мекендерде қарқынды жүргізілді. Аудан орталығында ұйымдастырылған сенбілік барысында Әйтеке би кентінің кіреберісіндегі «Жасыл белдеу» аумағында шөп шабу, талдарды әктеу жұмыстары атқарылды. Сонымен қатар, Қ.Пірімов, Т.Бөріқұлақов көшелерінде және аудан орталығындағы Рәміздер алаңында санитарлық тазалық жұмыстары жасалды.
Әйтеке би кентінде өткен сенбілік барысын Қазалы ауданының әкімі Алмасбек Есмаханов аралап көріп, кент әкімі мен тазалық жұмыстарына жауапты сала басшыларына бірқатар нақты тапсырмалар жүктеп, елді мекендердің тазалығын тұрақты бақылауда ұстау қажеттігін атап өтті.
Сенбілік жұмыстарын аралау барысында теміржол вокзалы аумағындағы абаттандыру жұмыстарын да көріп, мердігерлерге жұмысты сапалы әрі қысқа мерзімде аяқтауды тапсырды.
Жалпы бүгінгі сенбілікке аудан бойынша 138 мекемеден 1900 адам қатысып, 11 техника жұмылдырылды. Арнайы полигонға 12,5 тонна қоқыс шығарылды.
Қармақшыда тазалық жұмыстарын тұрақты бақылауда ұстау қажеттігі айтылды
Бүгінде елді мекендердің тазалығы мен көркеюі – тұрғындарға қолайлы орта қалыптастырудың басты міндеттерінің бірі.
Осыған орай Қармақшы ауданы әкімінің тапсырмасына сәйкес, аудан әкімі аппаратының басшысы Ермек Сәтбаев Ақтөбе, ІІІ Интернационал, Жаңажол, Иіркөл және Төребай би ауылдық округтеріне арнайы барып, атқарылып жатқан жұмыстарды тексерді.
Аралау барысында әр елді мекеннің мектеп аумақтарының тазалығы, балалар ойын алаңдары мен спорт алаңдарының жағдайы, саябақтар мен қоғамдық демалыс орындарының жағдайы бақылауға алынды.
Ермек Сәтбайұлы тазалық жұмыстарына белсенді атсалысып жүрген азаматтарға туған жердің тазалығы мен көркеюіне жанашырлық танытып, үлгі болар ортақ іске жұмыла қатысқандары үшін алғысын білдірді.
Балалар мен тұрғындарға арналған нысандардың қауіпсіздігі — басты назарда. Сондықтан, жұмыс барысында анықталған мәселелер бойынша жауапты басшыларға тазалық жұмыстарын тұрақты бақылауда ұстау қажеттігі айтылды.
Жалағаш кенті мен барлық ауылда тазалық жұмыстары ұйымдастырылды
Мемлекет басшысының бастамасымен қолға алынған «Таза Қазақстан» экологиялық акциясы бүгінде ел өміріндегі маңызды бастамалардың біріне айналды. Бұл — қоршаған ортаны таза ұстауға бағытталған ортақ жауапкершілік пен күнделікті мәдениетті қалыптастыратын игі іс.
Акция аясында Жалағаш кенті мен барлық ауылдық округтерде кең көлемде сенбілік жұмыстары ұйымдастырылды.
Тазалық жұмыстары барысында көшелер мен тротуарлар, қоғамдық орындар мен аяқсу арналары қоқыстан тазартылып, ағаштар әктелді. Сонымен қатар, орындықтар мен қоршаулар, ғимараттардың қасбеттері сырланып, жол белгілері мен жол сызықтары жаңартылды.
Жалағаш ауданының әкімі Ардақ Ибраимов тазалық жұмыстарын аралап көріп, жауапты мекемелерге санитарлық тазалықты тұрақты бақылауда ұстау, қоқысты уақытылы шығару жөнінде нақты тапсырмалар берді.
Сырдарияда кең көлемде сенбілік өтті
«Таза Қазақстан» экологиялық акциясы аясында аудан орталығында және елді мекендерде санитарлық тазарту бойынша сенбілік өтті. Тазалық жұмыстарына аудандағы меншік түріне қарамастан барлық мекеме атсалысты.
Сенбілік барысында әрбір мекеме қызметкерлері өздеріне бекітілген көше бойына көркейту-көгалдындыру жұмыстарын жүргізіп, аулаларды қоқыстан тазалады.
«Алдағы уақытта да сенбілік жұмыстары жалғасын табатын болады. Аудан тұрғындарын тазалық шараларына белсене қатысуға және тазалық сақтауға шақырамыз!» деп жазды Сырдария ауданының әкімдігі ресми парақшасында.
Шиеліде абаттандыру және көгалдандыру жұмыстарының барысы сараланды
Шиелі ауданының әкімі Айтбай Жандарбеков тиісті сала басшыларымен бірге Мемлекет басшысының бастамасымен жүзеге асып жатқан “Таза Қазақстан” экологиялық акциясы аясында Шиелі ауданындағы абаттандыру және көгалдандыру жұмыстарының барысын аралап, атқарылып жатқан жұмыстарды жан-жақты көрді.
Аралау барысында кент аумағындағы орталық көшелердің тазалығы, санитарлық жағдайы, кәсіпкерлік нысандардың сыртқы келбеті, жасыл желектерді отырғызу, гүлзарлар мен демалыс орындарын күтіп ұстау, сондай-ақ ирригациялық және аяқ су жүйелерінің жай-күйі назарға алынды. Сонымен қатар, жол бойындағы ретсіз қоқыс орындарын жою, көше бойларын біріздендіру және қоғамдық орындардың эстетикалық келбетін жақсарту бағытындағы жұмыстар пысықталды.
Аудан әкімі көркейту-көгалдандыру жұмыстарының сапалы әрі белгіленген мерзімде орындалуы маңызды екенін атап өтіп, жауапты сала басшыларына нақты тапсырмалар жүктеді. Әсіресе, тазалық жұмыстарын жүйелі түрде жүргізу, тұрғындардың экологиялық мәдениетін қалыптастыру бағытындағы жұмыстарды күшейту қажеттігін айтты.
