Қызылорда облысында «Таза Қазақстан» бағдарламасы аясында ауқымды абаттандыру және көгалдандыру жұмыстары қарқын алды. Өңірде санитарлық тазалықты сақтау, тұрғындарға қолайлы өмір сүру ортасын қалыптастыру және елді мекендердің сәулеттік келбетін жаңарту бағытындағы жобалар кезең-кезеңімен жүзеге асырылып жатыр.
Соңғы жылдары аймақта бюджет қаржысымен қатар кәсіпкерлердің демеушілігі есебінен көптеген қоғамдық кеңістік жаңғыртылды. Атап айтқанда, Қызылорда қаласындағы орталық алаң, мәдени-демалыс паркі және Қорқыт ата сквері заман талабына сай қайта жөндеуден өтті. Қоғамдық орындардың инфрақұрылымы жаңарып, тұрғындардың демалысына қолайлы жағдай жасалды.
Мемлекет басшысының облыс орталықтарының маңынан экопарктер құру жөніндегі тапсырмасы аясында Қызылорда қаласында жаңа Президент саябағы салынды. 31 гектар аумақты алып жатқан нысанда заманауи субұрқақтар, амфитеатр, балалар ойын және спорт алаңдары, веложолдар мен жаяу жүргіншілерге арналған соқпақтар бой көтерді. Сонымен қатар, мұнда биіктігі 50 метр болатын шолу дөңгелегі орнатылған.
Саябақ аумағын көгалдандыруға ерекше көңіл бөлінген. Мұнда 10 мыңнан астам ағаш көшеті, 50 мыңнан аса сәндік бұта мен 17 мың көпжылдық гүл егілген. Мамандардың айтуынша, бұл аймақ алдағы уақытта қаланың басты экологиялық және туристік нысандарының біріне айналуы мүмкін.
Қазіргі уақытта Президент саябағы аумағында 300 орындық балалар лагері мен Ботаникалық білім беру орталығының құрылысы жүріп жатыр. Жоба аясында тропикалық және экзотикалық өсімдіктер өсірілетін арнайы бақ ашу жоспарланған.
Абаттандыру жұмыстары облыс орталығымен шектелмейді. Аймақтың барлық ауданында жаңа аллеялар мен демалыс орындары салынып, көшелер жарықтандырылып, қоғамдық кеңістіктер жаңартылуда.
Мәселен, демеушілердің қолдауымен Жаңақорған ауданы аумағында жаңа демалыс паркі пайдалануға берілді. Ал Нағи Ілиясов ауылында «Еңбекшілер аллеясы» салынды. Жаңажол ауылында орталық алаң абаттандырылып, Таң ауылы көшелерінің келбеті жаңарды.
Өңірде экология мәселесіне де басымдық беріліп отыр. Қатты тұрмыстық қалдықтарды сұрыптау, қайта өңдеу және кәдеге жарату бағытында Жасыл даму қаржыландыруымен тоғыз жоба іске асырылуда. Бұл салаға шетелдік инвестициялар мен заманауи технологиялар тартылған.
Сонымен қатар, Қызылорда қаласында шетелдік компаниялардың қатысуымен қалдықтарды өңдеуге арналған екі ірі өндірістік жобаның құрылысы басталды. Мамандар мұндай бастамалар аймақтағы экологиялық ахуалды жақсартып қана қоймай, жаңа жұмыс орындарын ашуға да мүмкіндік беретінін айтады.
