Мәжіліс депутаты, Талғат Адамбеков Үкіметке жолдаған депутаттық сауалында «Таза Қазақстан» экологиялық бастамасын тұрақты жалпыұлттық қозғалыс деңгейіне көтеруді ұсынды.
Депутаттың айтуынша, Мемлекет басшысы көтерген бұл бастама бүгінде қарапайым сенбілік немесе бір реттік акция шеңберінен шығып, қоғамда жаңа экологиялық мәдениет қалыптастыратын маңызды жобаға айналған.
Сауал Олжас Бектенов атына жолданды. Онда «Таза Қазақстан» идеясының халық арасында кең қолдау тапқаны және азаматтардың қоршаған ортаға жауапкершілікпен қарауына ықпал еткені атап өтілген.
Депутат 2026 жылғы республикалық референдумнан кейін қабылданған Конституцияның кіріспесінде табиғатты аялау мәселесі арнайы көрсетілгеніне назар аударды. Оның пікірінше, бұл экологиялық жауапкершілікті мемлекеттік саясаттың негізгі бағытына айналдыруға жол ашады.
Осыған байланысты Талғат Адамбеков Үкіметке бірнеше нақты ұсыныс жолдады. Атап айтқанда, барлық саяси партияларға «Таза Қазақстан» қағидатын өз бағдарламалары мен жарғыларына енгізу ұсынылды. Депутаттың пікірінше, бұл бастама қандай да бір саяси идеологиядан жоғары тұратын ортақ ұлттық құндылыққа айналуы тиіс.
Сонымен қатар ол «Таза Қазақстан» аясында тұрақты жұмыс істейтін республикалық штаб немесе жалпыұлттық қозғалыс құру қажет екенін айтты. Оның сөзінше, экологиялық мәдениетті қоғамның күнделікті өмір салтына айналдыру үшін жүйелі жұмыс қажет.
Сауалда арнайы цифрлық платформа мен сайт ашу мәселесі де көтерілген. Бұл ресурстар арқылы экологиялық акциялар туралы ақпарат таратып, тұрғындардың қатысуын үйлестіру ұсынылды.
Депутат экологиялық шаралардың тек көктем мен күз мезгілімен шектеліп қалмауы керектігін де атап өтті. Оның пікірінше, жыл бойы тарихи және табиғи нысандарды түрлі жазулардан тазарту, қоқыс жинау секілді тұрақты акциялар өткізілуі қажет.
Бұдан бөлек, депутат су ресурстарын үнемдеу мәселесіне де тоқталды. Ол ауыл шаруашылығында жаңбыр және еріген қар суын жинап, сақтайтын арнайы резервуарлар жүйесін құруды ұсынды.
Сондай-ақ елді мекендер арасындағы жолдардың бойына көпжылдық ағаштар отырғызып, «жасыл дәліздер» қалыптастыру бастамасы көтерілді. Депутаттың айтуынша, бұл қыс мезгіліндегі қар үйінділерін азайтып, жолдардың жиі жабылу мәселесін төмендетуге көмектеседі.
Мәжіліс депутатының пікірінше, «Таза Қазақстан» енді тек экологиялық науқан емес, қоғамды біріктіретін ұзақмерзімді ұлттық идеология элементіне айналуы керек.
