Қаладағы Батырхан Шүкенов атындағы саябақта татар этносының дәстүрлі ұлттық мерекесі – «Сабантой-2026» аталып өтті. Береке мен бірлікті, еңбек пен достықты дәріптейтін мерекеге қала тұрғындары мен қонақтары, этномәдени бірлестіктер өкілдері, зиялы қауым және өнерсүйер қауым қатысты.
Мерекенің шымылдығы «Сарман» вокалдық тобының орындауындағы «Сыр елім» әнімен түріліп, ұлттық әндер мен әсем бимен жалғасқан концерттік бағдарлама көпшілікке көтеріңкі көңіл күй сыйлады. Сахна төрінде қазақ және татар мәдениетін айшықтайтын өнер туындылары ұсынылды.
Салтанатты шарада жиналған жұртшылықты облыстық қоғамдық даму басқармасы басшысының орынбасары Артур Қамбаров құттықтап, өңірдегі этносаралық татулық пен қоғамдық келісімді нығайту жолындағы мұндай игі бастамалардың маңыздылығына тоқталып, сабантой мерекесінің халық арасындағы достықты, өзара құрмет пен ынтымақтастықты арттырудағы ерекше ролін атап өтті. Сонан соң ұзақ жылдан бері орталықпен тығыз байланыста еңбек етіп келе жатқан белсенділерге құрмет көрсетіліп, облыс әкімі мен облыстық қоғамдық даму басқармасы басшысының Алғыс хаты табысталды.
Мерекеде облыстық татар этномәдени орталығының төрағасы Галия Гизатуллина сөз сөйлеп, сабантойдың тарихы мен тағылымына тоқталды.
Жиында Татарстан Дүниежүзілік конгресі Атқару комитеті мен Татарстан Республикасының Қазақстан Республикасындағы Өкілетті өкілдігі тарапынан да бірқатар азаматтар арнайы марапатқа ие болды.
Іс-шара аясында ұлттық спорт түрлерінен жарыстар ұйымдастырылып, қатысушылар татарша күрес, арқан тарту, қол күрес және ауыр салмақ көтеру секілді сайыстарда бақ сынады. Жеңімпаздар арнайы дипломдармен және бағалы сыйлықтармен марапатталды. Балаларға арналған ұлттық ойындар да көпшіліктің қызығушылығын тудырды.
Соңында Татарстан Республикасынан арнайы келген өнерпаздар – Татарстан Республикасының еңбек сіңірген әртістері мен Қазан қалалық филармониясының өкілдері мерекелік концерт ұсынып, көрермендерге ерекше көңіл күй сыйлады.
