«Қасиетті Қармақшы, өзіңнен шықты бар жақсы», – деп ақын Қали Шыңғысов жырлағандай, киелі өлкеден талай дарын иелері өсіп-өнді. Солардың бірі – халық ауызында Тұрман есімімен сақталған Тұрмахан Омаров ағамыз.
Тұрмахан Омаров – жан жақты терең біліктікті бойға сіңірген дарын. Аса өзекті де өткір тақырыптардың тереңіне сүңгитін керемет табиғи дарынның, қабілеттің иесі.
Бүгін «Қармақшы ақындарын ұмытпайды!» жобасы аясында К.Рүстембеков атындағы Жыраулар үйінің ұйымдастыруымен өткізілген Қармақшы ауданының құрметті азаматы, ақын Тұрмахан Омаровты еске алуға арналған «Жырымнан мені танырсың» атты рухани жыр кешінің алғашқы сөзі аудан әкімінің орынбасары Молдабаев Диас Асылбекұлына беріліп, ақынның төл туындысы «Толқын өмір» атты жыр кітабының тұсаукесер рәсімі өткізілді. Жаңа кітаптың тұсау кесер рәсіміне Қармақшы ауданының құрметті азаматы Әбдірахман Құлдүйсенов, ардагер Шегебай Құндақбаев, ақын Дастан Нәзікбаев және Тұрмахан ағаның жары Күлшат Тасыбайқызы арнайы сахнаға шақырылып, естелік лебіздерін жеткізді.
Елдің жақсылары мен жайсаңдарымен дос бола білген Тұрман ағамыз туралы«Қазақтелеком» АҚ Қармақшы аудандық филиалының бастығы Маржан Молдабаева, ардагер Өтемұратов Бекмат естеліктерін айтты.
Қайталанбас дара қолтаңбасымен ақындық өнерге өшпес із қалдырған болмысы бөлек ақын, толымды талант иесінің толағай тұлғасына жас ақындар Гүлжанат Дүзенова, Нұркелді Өтепберген, Мөлдір Тәңірбергеновалар жырларын арнады.
Ақын рухына құрмет ретінде ақынның сырлы өлеңдерін Амира Кішкентаева, Нұртілек Айтбай, Аяна Жанболат, Іңкәр Қойшыбай,Өміртай Тоғжан, Шаттық Ғалымқызы, Алина Мұратхан, Айша Орынбаевалар жатқа оқыса, жыршы-термешілер Руслан Өтегенов, Айдана Амантайлар Сыр мақамдарында нақышына келтіре орындап, көпшілік көңілінен шықты.
Киелі өлең жырдың шырағын өшірмей, ұлықтап өткен үлкен жүректі ақын ағаның асыл жыр-мұрасына арналған рухани кешке қатысушыларға аудан әкімінің алғыс хаты мен ұрпақтары атынан сый-сияпаттар табыс етілді.
